Sjølv valde han å ikkje bruke tid og kløkt på å føreslå endringar i vedtektene, sjølv om både han og andre i bystyret synest det er merkeleg at det t.d. skal vere forbode å kaste eller sleppe stein eller snøball.
– Dersom du held ein snøball, og politiet ber deg om sleppe han, så går du rett i fella. Du må legge snøballen pent og pynteleg frå deg. Så har vi som seg hør og bør forbod mot å urinere på offentleg stad, men det står ingenting om å gjere frå seg på andre måtar.
I vedtektene står det at det ved eller på offentleg stad, er det forbode å kaste eller sleppe stein, snøball eller anna som kan vere til skade eller ulempe for dei som ferdast der.
Kva er sømeleg?
På einskilde felt er vedtektene svært klare og detaljerte, på andre område er det rom for skjønn.
– På kyrkjegardar skal ein ikkje drive med aktivitetar som ikkje sømer seg, og då må det vere opp til folk flest eller politiet kva som er usømeleg, om det handlar om å gå i kortbukse eller anna, skal eg ikkje meine så mykje om, seier Djuvik.
Sjølv fleipa han i bystyret med at han personleg kunne tenke seg nokre tillegg.
– Eg sa at menn over 50 i trange sykkelbukser sjenerer meg, og at vi kanskje skulle vurdere å ta det med i vedtektene, utan at eg fekk den heilt store tilslutnaden til det. Når vi ser på samansetjnga i Flora bystyre så skjønar ein kanskje kvifor.
Djuvik trur ikkje politivedtektene kjem til å bli særleg mykje brukte.
– Eg håpar at kommunetilsette og politifolk ikkje brukar mykje tid på å handheve forboda. Om nokon skulle finne på å ha ein liten snøballkrig håpar eg ikkje politiet grip inn og avbryt den.