Avgjerda om å etterbetale 59 øre per liter levert mjølk i fjor, betyr at ein gjennomsnittleg mjølkebonde som leverer til Tine, får ein bonus på 97.000 kroner, skriv Nationen.
Dermed er fjorårets bonusrekord slått til gagns, med heile 40 prosent.
– Det er veldig bra at dei forvaltar mjølka vår så bra, kjem med nye produkt og tek grep for å styrke konkurransekrafta og økonomien for oss mjølkeprodusentar, seier mjølkebonde Sindre Årsvoll i Sandnes til avisa.
Betre enn offensivt mål
GLEDELEG: Både bøndene og meieristyrar Thorkild Heieren kan gle seg over auke i salet av mjølkeprodukt.
Foto: Eva Marie Felde / NRKTine leverte i fjor eit driftsresultat på nær 1,7 milliardar kroner. Det er ein auke på 315 millionar kroner for den bondeeigde samvirkeselskapet. I underkant av ti prosent av landets nær 9 000 mjølkebønder er å finne i Sogn og Fjordane. Samla står dei for seks-sju prosent av den totale mjølkeproduksjonen i Tine.
Medan salet av søtmjølk går ned, aukar salet ost, yoghurt og matlagingsprodukt. Konsernet nyt også fruktene av tiltak for å effektivisere drifta.
– Vi hadde eit offensivt mål om å forbetre drifta med 750 millionar kroner. Ved årsskiftet passerte vi 800 millionar, seier konsernsjef Hanne Refsholt til Nationen.
Betre utnytting
HALVPARTEN: Tine Byrkjelo var dimensjonert for 8 500 tonn Norvegia-ost i året. I fjor enda det på 11 000 tonn.
Foto: Bård Siem / NRKMedan Refsholt trur dette berre er opptakta til ein langsiktig styrking, ser også Thorkild Heieren, driftssjef ved meieriet på Byrkjelo, lyst på framtida.
Her produserer dei kring halvparten av Norvegia-osten som blir konsumert i Norge.
– Vi må utnytte både døgnet og veka for å møte etterspurnaden. No er det på gang ei stor utgreiing i Tine-systemet for å sjå på strukturen. I den settingen ligg det inne ein del alternativ som kan gi auke i produksjonen på Byrkjelo. Men den er ikkje ferdig og klar for styrehandsaming før i slutten av mars, seier Heieren.
