Dette oppslaget fekk teknisk sjef i Førde kommune, Bernhard Øberg, til å reagere kraftig.
– Då vi blei merksame på dette, så brukte vi føremiddagen på fredag til å fjerne alle plakatane. Det er rimeleg mange, og det er nærmast å rekne som forsøpling det dei har gjort, seier Øberg til NRK.
– Har teke seg til rette
Han peikar på at arrangørane ikkje hadde søkt om løyve til å henge opp noko som helst, og slett ikkje store plakatar, festa med strips, over heile Førde.
– Vi vil gjerne bestemme kva som skal henge langs med våre vegar. Dei må for det første innhente eit løyve frå oss som vegeigar. I tillegg er det søknadsplikt for reklame langs med offentleg veg. Dei har teke seg til rette, både på den eine og den andre måten, slår Øberg fast.
Innrømmer at dei ikkje hadde løyve
Det er Harald Sydow Ingebrigtsen i firmaet Hotwheels Brothers, som står bak turneen med dei ulike dinosaurfigurane. Han innrømmer at dei ikkje hadde søkt om løyve til å henge opp plakatane.
– Men vi har vore i Førde fleire gonger før, mellom anna med bilshow. Då har dette aldri vore noko tema, seier Ingebrigtsen.
Han syner til at dei har løyve frå politiet til å halde showet, men at det då burde vore ein klausul frå kommunen om at det ikkje var løyve til å henge opp plakatar.
– Det har dei i andre kommunar, til dømes i Sandefjord, der vi skal til hausten, seier arrangøren.
Kan hente plakatane
Bernhard Øberg i Førde kommune meiner uansett at det slett ikkje var rett av firmaet å henge opp dei store plakatane. Men han er viljug til å la nåde gå for rett.
– Vi har plakatane liggjande på vårt lager, dersom arrangøren er viljug til å dekkje våre utgifter, så skal dei få plakatane tilbake, seier Øberg.