Brannen i ein vindaugskarm i den gamle skulebygningen vart raskt oppdaga, og skadene vart til alt hell minimale. Gamle Dingemoen skule er ikkje i bruk til undervisning lenger, men det var folk i kjellaren då branntillløpet starta.
Lensmann i Fjaler, Åge Løseth, seier dei no følgjer opp saka.
– Vi har ikkje fullt oversyn enno, men det er ting som tyder på at brannen er påtent, og at det er gjort av barn som har vore i området og leika rundt skulen.
– Kva tenker du om det?
– Det er alvorleg at ein tenner på. I dette tilfellet skjedde det i ein gamal skulebygning der det var aktivitet i eit kjellarlokale der folk dreiv med miniatyrskyting.
Skal snakke med alle elevane
I dag skal folk frå politiet undersøke staden der det vart sett fyr og snakke med foreldra til dei involverte ungane.
Kommunalsjef Marit Hammer i Fjaler seier rektor på skulen i dag går rundt for å snakke om hendinga i alle klassane.
– Dette er veldig trasig, og vi må fylgje opp dette og snakke med alle elevane på skulen i dag. Dette skjedde etter skuletid. Det var ei tilstelling for småskulesteget, og det var foreldre som oppdaga brannen.