Bokfest – no også på bygda

Hausten byr på bokslepp frå dei store forlaga, som inviterer forfattarar og fiff på hagefestar med ein forsmak av dei nyaste bøkene. Aschehoug sin årlege hagefest på seinsommaren har nærmast blitt ein institusjon med skyhøg kjendisfaktor.

• LES OGSÅ: – Det er skamfullt at folk må leite etter bøker på nynorsk i nynorskland

Sjølv om Skald forlag ikkje held festen i ein hage, har dei lete seg inspirere av haustfestane i storbyane.

I fjor arrangerte dei sin første haustfest, og onsdag inviterte dei på ny gamle og nye forfattarar og lesarar til haustfest med ein lokal vri.

– Det var kjempesuksess i fjor, men eg må seie at det er endå betre i år, seier forlagssjef Simone Stibbe til gjestane når ho ønskjer velkomen.

Om lag femti gjestar har funne vegen til gamlehotellet i Leikanger, og alt er slik det skal vere på forlagsfest: Her blir det bydd på både raudvin og kvitvin, i tillegg til lokalprodusert øl.

I storstova der presentasjonen blir halde er det òg sett fram eple og plommer frå Sogn som gjestene kan forsyne seg av. Ingenting å utsetje på varene, med andre ord.

Betre enn Oslo?

Ein av gjestane på festen, er forfattar Sigrid Sandberg. Ho har tidlegare skrive biografiar om polfararar og sakprosa om klima. For tida jobbar ho med eit bokprosjekt om eit viktig fjell på Vestlandet, som ho foreløpig vil halde hemmeleg, så langt det let seg gjere.

Sandberg fekk ikkje med seg festen i fjor, men er desto gladare for å vere på plass i år. Ho har vore på fleire av dei store forlagsfestane i Oslo, og synest haustfesten i Leikanger er unik.

– Eg har vore på ein del festar i Oslo, men det er jo ikkje i nærleiken så god stemning som her, seier ein godt nøgd Sandberg.