NRK Meny
Normal

Bil hamna på taket etter utforkøyring

Ei kvinne i 20-åra er sendt til legesjekk etter at ho køyrde bilen utfor vegen og hamna opp ned i ei skråning ovanfor ei steinrøys.

Her blir bilen dratt opp att på vegen etter utforkøyringa.

VART BERGA: Her blir bilen dratt opp att på vegen i samarbeid mellom bilbergar og brannvesenet.

Litt over fem fekk politiet melding om at ein personbil hadde køyrt av vegen på fylkesveg 610 mellom Sande og Viksdalen. Det var ein person i bilen, ei kvinne i 20-åra.

Alle naudetatar vart kalla ut, i tillegg til luftambulanse.

Kvart på seks melde politiet at kvinna er berga ut av bilen. AMK opplyser at ho er sendt til legevakt for ein sjekk.

– Det står tilsynelatande bra til med vedkomande, det skal ikkje vere snakk om alvorlege skadar, seier Kai Myklebust ved operasjonssentralen i Florø.

Han fortel at bilen har hamna utfor vegen og ligg no opp ned i ei skråning ovanfor ei ur. Fotografen vår på staden fortel at eit tre stod i vegen for at bilen ikkje hamna i kast nedover steinura.

– Det er ingen andre som står i fare viss den skulle gje etter. Brannvesenet og bilbergar driv no med sikringsarbeid på staden, seier Myklebust.

Saka vil rutinemessig bli følgt opp av Førde lensmannskontor.

Første hybridferje er på plass på Anda-Lote