– Også av omsyn til jordvernet treng Norge større og meir robuste kommunar. Ein kommunereform er eit av dei viktigaste grepa for å få til betre arealplanlegging, sa landbruksministeren frå Stortingets talarstol denne veka.
Stortinget debatterte jordvern etter at regjeringa har gitt grønt lys for utbygging på dyrka mark nær Trondheim og i Akershus. Politisk er det sett på som eit noko kontroversielt klarsignal.
Og Knut Storberget frå Arbeidarpartiet sa frå talarstolen at han ikkje kunne sjå at større kommunar ville vere måten å verne om dyrka mark.
– Eg er tvilande til om større kommunar vil vere svaret for å ta vare på matjorda i Noreg.
Usemje om beste måten å verne om matjorda på
Jordverndebatten er høgst aktuell også her i Sogn og Fjordane. Den var viktig eit argument ved val av den omstridde vegtraseen i Lærdalsdalen, og i Stortingsdebatten trekte enkelte fram saka som eit døme.
Debatten viste at det er brei politisk semje om å ta vare på mest mogeleg av matjorda.
- LES OGSÅ:
- LES OGSÅ:
Listhaug argumenterte sterkt for at store kommunar er vegen å gå.
– Mange små kommunar konkurrerer for å få dei same innbyggarane og bedriftene til å etablere seg. Dei driv arealplanlegging på eit samla sett lite område, som kanskje ikkje er det mest gunstige.
– I store kommunar kan ein vurdere store areal under eitt, og få fleire område tilgjengeleg med sikte på utbygging, sa Listhaug.
Ho vil no arbeide opp mot KS for å sørgje for at kommuneplanlegginga tek endå betre omsyn til korleis dyrka mark kan takast vare på.
– I store kommunar vil det vere mogleg å bygge opp store og gode fagmiljø, og det er ein nøkkelfaktor i arbeidet med å ta vare på dyrka mark.