– Det blir nordleg stiv kuling på kysten. Om ettermiddagen og kvelden kan den komme opp i sterk kuling. Så det blir ein del vind på kysten. Det er verdt å legge merke til i og med at det er Jonsok og bålbrenning, åtvarar statsmeteorolog Haldis Berge.
Kastevindar og sløkkjeutstyr
Etter nokre varme og gode sommardagar kjem nordavinden med kaldare luft tysdag. Samstundes bur folk over heile fylket seg på å kveike fyr på årets jonsokbål. Langs kysten kan det by på utfordringar.
Ha vinden i tankane, før ein tenner på, er rådet frå Alarmsentralen i Sogn og Fjordane.
– Ta førehandsreglar. Ha ein plan for kva ein gjer om flammane skulle gå feil veg. Det er viktig at ein vurderer kastevindar og tek det roleg. Og ein bør ha sløkkemiddel tilgjengeleg, seier vaktleiar Frode Eide.
Periodar med sol
Med unntak av nordavinden, og lågare temperaturar, blir det likevel ein ok jonsok i vest, skal ein tru Vêrvarslinga for Vestlandet.
– Det blir ein ganske grei dag med periodar med sol, men det kan komme enkelte ettermiddagsbyer i indre strok. Vêrmessig, sett bort frå vinden, er det ikkje så ille, opplyser Berge.
Grått utover i veka
Utover veka kan ein vente seg mykje av det same vêret. Først mot helga ser det ut til at sommaren kanskje vender tilbake.
– Onsdag er det nok meir skya enn på tysdag, men vinden minskar utover dagen. Då blir det også enkelte byer. Torsdag og fredag ser ut til å bli meir tilskya med vestleg vind og byevêr. Men det ser ut til at det kanskje lettar igjen laurdag. Men det er langt fram, seier statsmeteorologen.