Det er enorme krefter i bulldosaren som skubbar store mengder stein og grus i samband med ferdiggjering av den nye europavegen. Vi er ved Tyinkrysset i Oppland, like ved inngangen til den nye tunnelen mot vest og Sogn og Fjordane. 25 år gamle Ann Kristin Vigdal er ei av tre jenter som jobbar på anlegget. Ho trivst i det mannsdominerte miljøet og i bulldosaren.
– Ja, i bulldosaren har eg det fint. Eg likar å byggje veg, seier ho smilande.
Jobbar lange dagar
Frøys Frøyslid (68) er driftsleiar i entreprenørselskapet Hæhre. Han er godt nøgd med framdrifta i arbeidet.
– Her jobbar vi frå sju om morgonen til 20 på kvelden. I dei mest hektiske periodane har vi også jobba på natta. Det har gått fort unna, og vi kjem til å bli ferdige før den opphavlege tidsplanen, seier han.
BLIR INSTRUERT: Ann Kristin Vigdal (25) får instruksjonar frå driftsleiar Frøys Frøyslid (68). Vigdal køyrer bulldosar som ho brukar til å jamne ut grus som blir tippa frå lastebilar.
Foto: Bård siem / NrkKostar 3,2 milliardar
I utbetringa av Filefjellsvegen inngår ny veg heilt frå Øye i aust, via ein lang tunnel på toppen av fjellet, og vidare ny veg til Borlaug i Sogn og Fjordane. Dette er ei strekning på fire mil, og dei samla kostnadene vil kome på 3,2 milliardar kroner. Mesteparten av utbetringa på vestsida er ferdig, og ny vegbane på heile strekinga vil vere klar i 2018.
- LES OGSÅ:
- LES OGSÅ:
Viktig utbetring
Odd Erik Haugen, prosjektleiar i Statens vegvesen, fortel at den nye vegen vil gjere det langt lettare å køyre over Filefjellet.
– Den nye vegen er heva opp to til tre meter i høve til eksisterande veg. På den måten vil snøen blåse lettare av. På dei vanskelegaste strekningane byggjer vi såkalla fresefelt. Dette er eit ekstra felt utanfor køyrebana som kan fresast vekk for å unngå høge brøytekantar, seier han.
STOR MASKINPARK: På det meste har det vore 150 anleggsmaskinar i sving under bygginga av den nye vegen over Filefjell.
Foto: Bård Siem / NRKGatelys på høgfjellet
Haugen fortel vidare at det også blir montert såkalla uvêrslys på delar av strekninga.
– Dette er ein type gatelys som vil bli tende når det er dårleg sikt. I tillegg vil ei vanskeleg strekke bli fjerna ved hjelp av den nye tunnelen. Målet er at det skal bli endå tryggare og meir føreseieleg å køyre bil mellom aust og vest, seier han.