Jølstringen er 16. generasjon som driftar garden med 55 mjølkekyr og 55 kviger og kalvar. På garden har Andreas Bolset eit nytt og moderne fjøs, som vart teke i bruk for to år sidan.
– Livet som bonde er godt. Ein har kanskje litt mindre fritid enn andre, men ein får styre sin eigen arbeidsdag, seier 30-åringen i ei pressemelding frå bondelaget.
– Gode førebilete
Leiar i Sogn og Fjordane Bondelag, Anders Felde, meiner nominasjonen er viktig for landbruket i Sogn og Fjordane.
– Unge bønder som har trua og som er stolte matprodusentar, er gode førebilete for vidare rekruttering til landbruket, seier Felde.
Prisen er eit samarbeid mellom Norges Bygdeungdomslag, McDonalds og Felleskjøpet Agri, og blir delt ut for sjuande året under Ung Bonde-samlinga i Oslo 12. november.
– Viktig kåring
Bolset er ein av 19 kandidatar som publikum kan røyste på. Dei fem med flest røyster går til finalen, der ein vinnaren vald ut av ein fagjury, som blir leia av landbruks- og matminister Jon Georg Dale (Frp).
– Dette er ei viktig kåring, og eg håpar at vinnaren i år kjem frå Sogn og Fjordane, seier Felde.
Kriteria for å få prisen er at bonden er under 35 år, er matprodusent og at han kan vere til inspirasjon for at andre skal finne vegen til landbruket.