"No må nokon sette foten ned!"

– Eg gremmest kvar gong eg går forbi Gjest Baardsen-skulpturen til Eikaas i Sogndal, seier Timberlid.

• LES OGSÅ: Kunstnar tykkjer Fridtjov Urdal-statuen er frekk og fri
• LES OGSÅ: Fridtjov fekk sin eigen statue

Etter at kulturmeldar Hans Jakob Reite kritiserte kunsten til Eikaas har debatten rulla i fleire fora, mellom anna på Facebook. Der har mellom andre Rune Timberlid kome med klare meldingar:

«Gjer oss til latter»

Innholdet som skulle vises her støttes dessverre ikke lenger.

– Gjest Baardsen-skulpturen hesleg

I intervju med NRK seier Timberlid at han ikkje har sett alt Stig Eikaas har laga, og at det godt kan hende noko av det er bra.

– Eg er ingen kunstkjennar, eg er meir oppteken av at det er styring på dette, men eg må seie at kvar gong eg går forbi Fossetunet i Sogndal så gremmest eg, for skulpturen av Gjest Baardsen synest eg er rett og slett hesleg.

(Artikkelen held fram under biletet).

Peikar på politikarane

Timberlid meiner politikarane må ha mot til å seie nei når Eikaas kjem og tilbyr seg å sette opp ein skulptur.

– Mitt bidrag er ikkje å dolke Eikaas som kunstnar, det får dei gjere som kan skulpturkunsten betre enn meg, men eg er meir oppteken av korleis vi utsmykker torg og parkar i fylket, og her peikar eg på politikarane som er ansvarlege for utviklinga av sine nærmiljø.

(Artikkelen held fram under biletet).

Ny Torsheim-skulptur i Askvoll

Det siste resultatet av skapartrangen til Stig Eikaas er ein skulptur av Fridtjov Urdal i Jølster. No vil han lage ein ny Oddvar Torsheim -skulptur, denne gongen i Askvoll. Og han har ikkje tenkt å stanse der.

– Det må vere 200 skulpturar, no har eg 100 med stort og smått. Eg vil ha 10-12 svære til, slik at når eg døyr skal alle vite at her har Stig Eikaas vore etter I.C. Dahl .

(Artikkelen held fram under biletet).

– Kan ikkje få dure fram

Men Rune Timberlid meiner at no må nokon sette foten ned, ideen om skulptur i Askvoll har han svært liten sans for.

– Skal vi utsmykke kysten og skipsleia kan vi ikkje overlate det til ein tilfeldig kunstnar. Det må vere gjennomtenkt, og det bør vere konkurranse, slik at det blir kvalitet på det som kjem opp. Han kan ikkje få dure fram etter eige forgodtbefinnande.

Men Stig Eikaas sjølv seier at han har Askvoll formannskap med seg på planane om ein Torsheim-skulptur. Det er Timberlid forundra over.

– Det er i så fall skremmande, med atterhald om at eg ikkje har sett planane. Kysten er ikkje eit område som bør bli belemra med kva som helst. Kysten vår er ei perle som vi må ta vare på.

– Stig Eikaas har proklamert at han vil lage ein skulptur av Hans Jakob Reite etter at han kritiserte Fridtjov-skulpturen hans. Du er ikkje redd for at han no lagar ein skulptur av deg og?

– Nei, redd er eg ikkje, eg er meir oppteken av kvar han eventuelt blir ståande.