– Mange trur at slaveriet endte med frigjeringa i Amerika for mange år sidan, men det vi veit er at det i dag finnes meir slaver enn det nokon gong har gjort, seier Kirsti Hellesøy.
Ho jobbar som frivillig i organisasjonen A21, og arrangerer Walk for Freedom i Førde. Det dei ønska å oppnå med å gå i dag, er å auke medvitet rundt menneskehandel.
– Kvart 30. sekund blir eit nytt menneske offer for menneskehandel. Det er viktig å sette fokus på dette, seier Kirsti Hellesøy.
IKKJE TIL SALS: Kirsti Hellesøy er frivillig og arrangerer Walk For Freedom gjennom byen i Førde.
Foto: Marte Iren Trøen / NRKGjekk med teip framfor munnen
Dei fleste som deltok var studentar ved United World College i Fjaler. Dei gjekk i stillheit med svarte klede og teip framfor munnen frå elvetorget, til NRK-bygget, rådhuset og tilbake.
Det er tredje gong A21 arrangerer markeringa, og 269 byar over heile verda var med i år. Men det er fyrste gong ein går for fridom i Førde.
GJEKK FOR FRIDOM: Med teip framfor munnen og skilt gjekk dei 40 oppmøtte gjennom gatene i Førde. Målet er å skape medvite om moderne slaveri.
27 millionar menneske er offer for menneskehandel
– Det er 27 millionar menneske som er offer for menneskehandel i dag. Vi veit at det er om lag 300 offer i Noreg som sel seksuelle tenester. Vi ønsker å skape medvit rundt at slaveriet ikkje er over, seier Kirsti Hellesøy.
– Det er ikkje mange nok som veit om at dette er eit aukande problem, seier Elodie Ithier som er elev ved United World College i Fjaler.
ENGASJERTE: Elodie Ithier og Tess Luttikhuis er studentar ved UWC i Fjaler, og gjekk for fridom i Førde.
Foto: Marte Iren Trøen / NRK