– Det var sonen min som presenterte meg for Sogndal. Han hadde sett ein reportasje på tv der Sogndal-spelarane vaska draktene sine sjølve, og vart umiddelbart fascinert, seier Ervin Kohn, leiaren for Det Mosaiske Trossamfund, fellesnemninga for dei jødiske samfunna i Norge.
– Vi tenkte med ein gong at «dette laget treng supporterar». Sogndal er eit pitte lite lag frå ein pitte liten stad, bygd på fellesskap og dugnadsånd.
– Dei viser at du ikkje treng vera stor for å ha suksess. Det minner om oss, Norges minste religiøse minoritet med 720 medlemmer. For oss er Sogndal eit føredøme, seier Kohn.
(Artikkelen held fram under biletet)
FØREDØME: – For norske jødar er Sogndal eit føredøme. Dei viser at ein ikkje treng å vere stor for å ha suksess, seier Kohn.
Foto: NRKHekla i Jerusalem
Kippaen med Sogndal-logo er ein av dei Kohn brukar mest og vart hekla i Jerusalem i to eksemplar. Ein til Ervin Kohn, og ein til sonen.
Far og son har hatt fleire utgåver, mellom anna ein brun ein som vart kjend i Karpe Diem sin video sin låten «Tusen Tegninger», med påskrifta «Stao no pao».
– Vi hadde også kvar sin kippa med den gamle SIL-logoen, seier Kohn.
Saftkokar
Han har berre vore på Fosshaugane ein gong. Det var i fjor, men har for vane å stå med Saftkokaradn når Sogndal spelar på Ullevaal.
– Det beste minnet mitt er frå regnværskampen mot Ullevaal i 2000, då Sogndal rykka opp og sendte Vålerenga ned i 1. divisjon. Eg er æresmedlem av Saftkokardn på livstid, seier Kohn.
Ber for siger
Søndag spelar Sogndal skjebnekamp mot Brann for å halda seg i Eliteserien. Fram mot kampen skal Kohn be, ikkje berre for siger til Sogndal, men for nederlag til nedrykksrivalane Fredrikstad, Sandnes Ulf og Hønefoss.
– Alle andre kryssar fingrane, eg ber sjølvsagt i tillegg, ler han.
– Brann har ikkje noko å spela for, så eg er optimist, legg han til.
"Feil" lag
KIPPA: Kohn i Sogndal-kippa framfor kong Harald og kronprins Haakon.
Han har brukt kippaen sin medan han har talt til kongen og kronprinsen, og ikkje minst i alvorlege møter med politiet i Oslo etter at trussamfunnet vart utsett for trugsmål.
– Den eine politimannen sa til meg at han berre hadde eitt problem med meg, og det var at eg var på feil lag. Eg reagerte litt i og med att det var ein heller alvorleg samtale vi hadde og lurte på kva han meinte med det. Då peika han berre på kippaen, ler Kohn.
– Men etterpå viste det seg at han heia på Tottenham, og det er jo eit jødisk lag.
Sogndal-kippa til gjestene
Fram til 27. desember skal far og son Kohn sine hovudplagg produserast i mange eksemplar. Då skal nemleg sonen gifta seg i Jerusalem, og tradisjonen tru får alle dei mannlege gjestene kvar sin kippa.
– Då blir det Sogndal-kippa på alle. Minst 200 stykke. Tore André Flo er forresten bedt, og vi håpar veldig på at han kjem, seier Ervin Kohn
UTSAL: Det er frå dette utsalet i Jerusalem at Ervin Kohn fekk tak i kippaen. Sogndal-kippaen ser du midt i, midt mellom store lag som til dømes New York Islanders og Indiana Colts.
Foto: privat