Det var laurdag føremiddag at Talia Indrebø Mellebye (14) og Therese Birkås Sleire (14) oppdaga spekkhoggarane i fjorden ved Vadheim. Dei to hadde bestemt seg for å nyte det fine vårvêret til det fulle, men fekk plutseleg sjå noko dei aldri før hadde sett.
– Det var heilt utruleg. Vi stod på bryggja, og så plutseleg var dei berre nokre meter uti fjorden, fortel Indrebø Mellebye.
Ho fortel at dei først vart heilt sjokka av synet. Dei to hadde tulla litt med at dei kanskje skulle sjå om dei kunne sjå nokre niser i fjorden, men då dei plutseleg oppdaga nokre langt større ute i fjorden var det langt ifrå venta.
– Det var jo nesten som nokre store monster som kom opp av vatnet, fortel dei.
Dei store dyra verka å kose seg i finvêret og var ganske tett opp mot land. Jentene fortel at dei såg kanskje sju-åtte stykke.
– Vi var heilt i hundre og var heilt over oss av begeistring, vedgår dei.
Etter ei stund byrja flokken av spekkhoggarar å flytte seg utover i fjorden att. Vadheimsfjorden er ein fjordarm av Sognefjorden og flokken har med eit besøk her kome ganske langt innover i landet.
– Vi har aldri sett noko slikt før. Det var eit veldig fint syn og noko vi aldri gløymer, seier dei to venninnene.