Vaikko NRK Sápmi leage unnimus NRK guđa juhkosis, de lea dat stuorimus sámi mediaásahus. NRK Sámis lea 1976 rájes leamaš váldokántuvra Kárášjogas. Muhto NRK Sámi sáddehatvistti Kárášjogas gal gárvánii easkka muhtun jagi maŋŋel, 1984s.
Sámi sáddehagat
Sihke Norggas, Ruoŧas ja Suomas leat sierra sámi sáddehagat (NRK Sápmi, SR Sameradion, SVT Sápmi ja YLE Sápmi).
Ovttas sáddejit Norgga, Ruoŧa ja Suoma sámi sáddehagat olles Sámis (earet ruoššabeale Sámis). Máŋga sáddaga sihke buvttaduvvojit ovttas ja sáddejuvvojit oktanaga iešguđet riikain.
Sisdoallu sápmelaččaide
NRK Sámi váldobargu lea ráhkadit mediasisdoalu sápmelaččaide, muhto NRK Sápmi galgá maid juohkit dieđu ja máhtu sámi servodaga birra muđui álbmogii.
NRK galgá nannet sámegielaid, kultuvrra ja identitehta. Dan dahkat beaivválaš fálaldagain sámi álbmogii, ja gaskkusteamin sámi birra Norgga álbmogiid muđui. Dát guovtteoasát doaibma lea dehálaš mihtu ollášuhttimii. Sámi servodaga ovdáneapmái lea dehálaš ahte majoritehtaálbmogas lea diehtu ja máhttu min birra.
NRK Sámi mihttu
Mihtus birra dadjá NRK Sápmi ná (jorgaluvvon dárogielas): "NRK Sápmi galgá leat veahkkin čuvget olles sámi álbmoga vuoi sáhttet aktiivvalaš oasi váldit sámi servodagas. NRK Sápmi galgá leat oktasaš arena buot sámiide - beroškeahttá máhttet go sámegiela vuoi eai."
Álgoálbmotovttasbargu
NRK Sápmi lea 2003 rájes oččodan ovttasbarggu eará álgoálbmotsáddehagaiguin, lasihan dihte álgoálbmotođđasiid ja eará álgoálbmotsisdoalu NRK Sámi fálaldagas. 2008s ásahuvvuige máilmmi álgoálbmotsáddehagaidfierpmádat, World Indigenous Television Broadcasters Network (WITBN). Fierpmádagas leat 14 mielláhttu, oktan NRK Sámiin (2013s). Fierpmádat galgá ovddidit prográmmaovttasbarggu, prográmmaráhkadeami ja prográmmalonohallama.
Mediasisdoallu
NRK Sámi mediafálaldat galgá čuvget, hástalit ja guoimmuhit sámi sisdoaluin maid olbmot gávdnet, válljejit ja ráhkistit. Mis galgá leat jeavddálaš fálaldat mánáide ja nuoraide, ja kultŧur ja guoimmuhansisdoallu
Earret ođas- ja áigeguovdilisságaid ráhkada NRK Sápmi kultur- ja guoimmuhansisdoallu, mánáid- ja nuoraidsisdoalu, mat almmuhuvvojit sihke neahtas, sosiála mediain, rádios ja TVs.
NRK Sápmi almmuha njeallji gillii; davvi-, mátta- ja julevsámegielaide ja dárogillii. NRK Sámi ođđasat ja eará mediasisdoallu neahtas leat sihke dárogillii ja iešguđege sámegielaide.