Nuvttá mánáidgárdi ávkin sámi bearrášiidda
Go ráđđehus doaivvu mielde addá nuvttá mánáidgárdesajiid mánáide Finnmárkkus ja Davvi-Romssas borgemánu 1. beaivvi rájes boahtte jagi, de dát mielddisbuktá ekonomalaš loktema máŋgga bearrašii, maiddái olu sámi bearrašiidda, dan čállá sámediggi preassadieđáhusas. – Sámediggi lea guhká bargan nuvttá sámi mánáidgárdesajiid árvalusain, nu ahte boahtte lávki ferte leat viiddidit ortnega nu ahte guoská maid eará sámi guovlluide, dadjá sámediggeráđđi Mikkel Eskil Mikkelsen.