Gárven bacheloroahpu ja 10 ođđa šuoŋa
Agnete Saba lea dán giđa gárven bachelorgráda popmusihkas, Høyskolen i Kristianias. Dán giđa lea son čállán bachelorčállosa ja logi ođđa lávlaga. Das son guorahallá mo sáhttá ovttastahttit sámegiela ja dárogiela popmusihkas.
Agnete dadjá NRK:i ahte son lea geahčastan maŋos ja viidáseappot bargan nu mo dalle dahke «Oro jaska beana» šuoŋain MGPjr-gilvvus.
– Mun ohppen ahte háliidan dakkár musihka ráhkadit ja čállit. Dovden ahte teavsttat šaddet eanet persovnnalaččat, dadjá Saba.
Barggadettiin dadjá iežas oahppan olu sámi musihkkaárbevieruid birra, ja dat lei hui mávssolaš sutnje. Saba lea geahččaladdan bidjat luđiid olbmuide ja lundui. Agnete ii daja veadjemeahttumin ahte juoigá eanet boahtteáiggis.
– Válddán mielde dan maid lean oahppan ja háliidan oahpásmuvvat eanet luđiide. Ferte oaidnit mii dáhpáhuvvá go manan fas studioi. Dat lei veahá ártet ahte luođit dušše bohte munnje dán háve, in dárbbahan bargat nu garrasit dainna.
Dán logi šuoŋas, mat gullet bachelorbargui, áigu Agnete moadde almmuhit. Árvideames gullat sus fargga ođđa musihka.
Gula olles jearahallama Agnetiin dás:
