Her har «alle» kaninane forsvunne eller døydd: – Mystisk

– Det krydde av kaninar for eit par veker sidan. Nå er det ingen å sjå, seier Randi Horve, som bur på Ullandhaug i Stavanger.

Tidlegare i juli skreiv NRK at ville kaninar er eit problem rundt Sørmarka i Stavanger, og at det blir fleire og fleire av dei.

Berre kort tid etter er situasjonen heilt annleis. No er det nesten ikkje ein einaste kanin i områda Ullandhaug og Sørmarka.

Fleire er òg funne daude.

Fant fire daude kaninar i hagen

Horve har budd i eit hus på Ullandhaug i Stavanger i 40 år. Aldri før har ho sett ein einaste daud kanin i hagen sin.

Ein dag ho kom heim frå hytta, låg det fire daude kaninar der.

– Etterpå har eg ikkje sett nokon levande kaninar. Det er litt mystisk.

Også Jarl Hoogstad, som dagleg går turar i området, har stussa over det han har sett.

– Kaninane var der på fredagen. Då eg kom tilbake på måndagen, var dei vekke.

Han fant fem daude kaninar.

Andre naboar og turgåarar som NRK har snakka med, har observert det same.

Kan vera sjukdom eller forgifting

Mattilsynet har òg fått fleire uavhengige tips frå folk om dette.

Dei har tatt inn to kaninakadaver til obduksjon, men sidan dei var øydelagde og hadde starta å rotne, var det ikkje mogleg å finne dødsårsaka.

– Det kan vera ein smittsam sjukdom eller ei form for forgifting, men utan å ha sett på obduksjon eller tatt prøver, veit me ikkje kva som er mest sannsynleg, seier veterinær i Mattilsynet, Ann Therese Kommedal.

Kan ikkje vera skoten

Stavanger kommune har heller ikkje noko klart svar på kva som kan ha skjedd.

– Det kan vera heilt naturlege variasjonar. At dei finn meir mat ein anna plass, seier naturforvaltar Vegard Ankarstrand.

Han meiner det ikkje vil vera mogleg at nokon skal ha klart å fått ned bestanden, sjølv om dei prøver.

– Folk spekulerer i om nokon skyt dei. Men ingen klarer å skyta ned ein kaninbestand i Sørmarka. Det er faktisk umogleg.

– Kvifor?

– Det er tusenvis av dei. Du klarar ikkje skyta tusenvis utan å bli oppdaga.

– Kan nokon ha fjerna dei med å legga ut feller eller gift?

– Nei. Kaninar er ikkje ein art som egner seg å forgifta, fordi dei et gras og planter. Dei er òg vanskelege å fanga i feller. Det er vanskeleg å regulera ein bestand av kaninar.

Ulovleg å jakte nå

Stavanger kommune seier at kaninane ikkje er ønska, men at dei ikkje har ressursar eller grunnlag til å fjerna dei.

Det er ikkje lov for privatpersonar å fanga eller drepa dei.

Jakt av viltlevande kanin er berre lov dersom ein jakter i sesongen (10. september til 29. februar) og har løyve frå grunneigar.

Jakt på kommunal grunn er uansett ulovleg, opplyser naturforvaltaren.