Uvanleg mange ledige studenthyblar

Studentane i Stavanger er i gang med semesteret for fullt i dag. Vanlegvis er det overskrifter som « 180 studentar manglar bustad », « 1100 søkarar til 280 studenthyblar » og « fordobling i studentboligkø » ein finn når det blir skrive saker om studentar som treng husvære i Stavanger. Men slik er det ikkje rundt studiestart i år.

«Oljå» og hybelbygging

– Nett no har me mellom 25 og 30 ledige bustadar, og det er stort sett parbustadar, seier Øyvind Lorentzen, dagleg leiar i SiS Bolig.

Det er fleire ting som gjer at årets situasjon er langt frå normalen. Nedgangen i olja gjer at det blir mange ledige bustadar på den private marknaden, samstundes som Studentsamskipnaden har bygd nye leilegheiter.

– Me har ferdigstilt over 200 bustadar til semesterstart. Dei to tinga gjer at tilbodet vårt er mykje større enn tidlegare år. Det er ti år sidan sist det var slik, i 2005 hadde så låge ventelister, seier Lorentzen.

• LES OGSÅ: Bli med inn i dei nye studentbustadane i Bjergsted

Jublar ikkje heilt endå

Gymsalar og nedlagde sjukeheimar er blant dei plassane huslause studentar tidlegare år har måtta ty til medan dei venta på ein meir permanent stad å tilbringa studentdagane sine. I år står gymsalane tomme.

– På det meste var det over 40 som budde på flatseng i august i samband med semesterstart. I fjor var det om lag 15, og i år er det ingen, seier Lorentzen.

• LES OGSÅ: «Eg trur ikkje eg får gjort mykje skulearbeid inne i eit telt»

Men i Studentorganisasjonen (StOr) let dei både blautkaka og sjampanjen stå i ro inntil vidare.

– UiS veks stadig, det gjer også dei andre utdanningsinstitusjonane i byen, og det blir ikkje bygd like mange studentbustadar som det blir tatt inn nye studentar. Me trur at i år er eit unntak, og at etterspurnaden vil bli veldig mykje større, seier Magne Bartlett, nestleiar i StOr.