Klokka 02.11, natt til søndag, fekk politiet melding om at ein fritidsbåt hadde kollidert med ein gjenstand i Åmøyfjorden. Truleg dreier det seg om ei stor flytande bøye.
Det var tre menn i 30-åra om bord, føraren av båten og to passasjerar. Samanstøyten var så hard at begge dei to passasjerane fekk hovudskadar.
Dei to blei frakta til land og deretter sendt med ambulanse til traumemottaket på Stavanger universitetssjukehus.
– Det er foreløpig ikkje kjent kor alvorleg skada dei er, men politiet har ikkje fått melding om at det er livstruande, opplyser operasjonsleiar John Ask.
Alle dei tre kjem frå stavangerdistriktet.
Politiet tok blodprøve
Båtføraren er avhøyrt, og politiet har tatt blodprøve av han.
Hovudredningssentralen leia redningsarbeidet og brannvesenet sørga for å få fritidsbåten til Stavanger.