Stenger fontena for å spara straum

– Me ønsker å visa innbyggarane at me har lyst til å spara energi.

Det seier Tor-Arne Fjogstad, energiingeniør i Stavanger kommune.

– I denne tida må me verkeleg skru igjen kranane der dei lekker, seier han.

Byter lyspærer

Stavanger kommune har 27.000 gatelys. Så langt har over halvparten av gatelysa fått nye lyspærer for å få ned straumrekninga.

– Me halverer straumforbruket på alle kommunale gater berre på gatelys, fortel Eirin J. Berg.

Ho er rådgjevar for belysning i Stavanger kommune, og fortel at dei har sett tydeleg forskjell på straumforbruket.

– Det har gått ned etter kvart som me har bytta ut med LED, seier ho.

Skrur av lysa på natta

Kommunen har kvar veke møte kor dei diskuterer straumsparetiltak.

– Me skal slå av eller dimma ned kraftig på kommunale vegar på natta, fortel rådgjevaren.

Dette skjer når det er lite trafikk og få folk ute.

– Det blir primært på turvegar og turområde som blir slått av først, fortel Berg.

Reguleringa skjer i tett dialog med politiet med tanke på sikkerheit.

– Det manglar noko

Innbyggarane i Stavanger synest det er trist at fontena er skrudd av.

– Det er rart å gå her utan at ho er på, seier Monica Haga.

– Det er synd, men eg skjøner grunnen, fortel Joakim Gunnar.

Men dei forstår at kommunen òg må spara straum.

For energiingeniør Fjogstad er det å skru av fontena helst symbolsk, men han meiner at alle moner dreg.

– Gjerne triggar dette andre til òg å spara energi, seier han.