Prjin (17) brukte ferien til å kjempa mot IS

17 år gamle Prjin Atrushi frå Nærbø har lenge engasjert seg sterkt i kampen mot terrorgruppa IS. Før jul reiste ho til ein flyktningleir nord i Irak for å hjelpa dei som har flykta frå terrorgruppa. Ho delte ut mat, klede, sko og litt medisinar i byen Dohuk, som berre er 40–50 minutt med bil frå IS-kontrollerte Mosul.

– Eg kjem aldri til å gløyma det eg opplevde. Ungane var utan foreldre, dei visste ikkje om foreldra var døde eller om dei berre var vekke. Ein annan unge hadde sett foreldra sine bli drepne av IS, han var berre fire år gamal.

• LES OGSÅ: – Drapstrusler skremmer meg ikke
• LES OGSÅ: Har blitt truga på livet - likevel nektar ho å la seg knebla i kampen mot terror

Drapstrugslar

Oppdraget ho var ute på var langt frå ufarleg. I haust måtte bror hennar flykta frå byen, då IS truga han på livet fordi ho har engasjert seg i kampen mot IS og terror. Ho har sjølv familiemedlemmar som har blitt drepne av terrorgruppa.

– Så det er ikkje berre folk som trur på andre religionar dei drep, dei drep muslimar også. Muslimar er ikkje terroristar, det er berre ekstremistane som prøver å øydeleggja islam, seier ho.

Har lyst å kjempa

Atrushi er kurdar og bar den kurdiske hær sin uniform under hjelpearbeidet. Fleire av hennar slektningar som bar den same uniforma har mista livet sitt i kampen mot IS, ein kamp ho skulle ønskje ho kunne delta i.

– Om dei hadde trengt meg og eg hadde hatt moglegheit, så ville eg vore med dei og kjempa, seier ho.

Skal tilbake

Trygt tilbake i Noreg er inntrykka mange, men først og fremst føler ho at ho burde gjort meir for flyktningane i heimlandet.

– Det er vinter, og dei har ikkje klede, hus, mat eller nok varme. Dei treng oss. Eg har framleis vondt inne i meg fordi eg føler eg ikkje gjorde nok, seier ho.

Vinteren og våren skal ho bruka til å samla inn meir pengar til medisinar og varer.

– Eg håpar at me også kan ta med nokre legar tilbake til Kurdistan neste gong me skal ned dit, seier ho.