Politiet trur sonen drap foreldra

– Familien ønsker ro rundt drapssaka, seier bistandsadvokat Hege Salomon til NRK.no.

Ho representerer søskena til 22-åringen, som ifølgje politiet sin teori, drap begge foreldra sine på Tasta i Stavanger måndag kveld. 22-åringen døydde sjølv i ei trafikkulukke seinare på dagen.

Søskena har med andre ord mista den yngste broren sin og foreldre i løpet av nokre dramatiske timar i Stavanger i går kveld.

• Les òg: Gutt slo alarm om rare lyder, politiet rykket ikke ut
• Les òg: De tre involverte i knivdramaet er døde

– Korleis har den nærmaste familien det nå?

– Eg kan dessverre ikkje kommentera dette utover det som er normalt i ein slik sak, seier Salomon.

Hendingsgangen for Tasta-drapa:

• Klokka 16.30 – ein tenåringsgut ringer til politiet og fortel om rare lydar frå den aktuelle adressa. Politiet såg ikkje på meldinga som alvorleg, og rykka ikkje ut til adressa.
• Klokka 20.08 – politiet får melding om at ei kvinne mot sin vilje blir dregen inn i den aktuelle bustaden.
• Klokka 21.18 – politiet går for første gong ut og stadfester at dei har funne ein død mann (55) i eit hus på Tasta. Dei opplyser også om at ei kvinne (52) på same adresse er hardt skadd.
• Klokka 21.30 – ein mann dør i ei frontkollisjon på E39 i Bjerkreim. Politiet trur dette er sonen til ekteparet som blei funne på Tasta. Bilen han køyrde var registrert på mora. Han krasja med ein lastebil, sjåføren av denne fekk lettare skadar.
• Klokka 03.03 – Stavanger universitetssjukehus melder at den hardt skadde kvinna er død, som følgje av stikkskadane ho hadde fått tidlegare på kvelden.

Høyrde kvinneskrik

At politiet ikkje rykka ut på den første meldinga dei fekk om «rare lydar» på adressa er noko Salomon framleis ikkje har diskutert med familien. Ho vil heller ikkje kommentera korleis familieforholda var.

Naboar NRK har snakka med fortel om eit stille nabolag, men også om bråk og krangling i drapshuset den siste tida.

Ein tidlegare ven av 22-åringen, fortel at ho den siste tida har høyrt kvinneskrik. Ingen NRK var i kontakt med ville stå fram med namn og bilete.

Politiet jobbar nå med ein hovudteori om at sonen i huset har drepe begge foreldra sine.

– Hovudteorien vår er at 22-åringen drap foreldra sine, stakk av i bilen til mora og døde i trafikkulukka, seier politiinspektør Ernst Rossebø til NRK.no.

Dei ventar likevel på obduksjonsrapport av dei døde og etterforskar framleis breitt med vitneavhøyr og krimteknisk arbeid.

– Den eine av dei døde blei obdusert i dag og dei to andre vil bli obdusert i morgon.
Den formelle identifiseringa av dei døde kan framleis ta noko tid, og det vil av den
grunn framleis gå noko tid før namna på dei døde kan frigis, seier Rossebø.

Har kalla inn krisehjelp

Stavanger kommune mobiliserte i dag kriseteamet i kommunen for dei pårørande og etterlatne etter dobbeltdrapet.

Legevaktsjef i Stavanger, Irene Bekkelund, fortel at dei byrja med å planlegga oppfølginga i dag tidleg.

– Me vil hjelpa til med samtalar og oppfølging til dei direkte berørte og til dei pårørande, seier Bekkelund.