NRK Lokalen på valturné

NRK Rogaland gjentar suksessen frå sist kommuneval. I dei neste vekene reiser vi til alle kommunar i Rogaland for å lage direkte valsendingar på radio. Det blir også TV-innslag og nettsaker frå stadene vi besøker.

Vi startar opp med ein times sending frå Kvitsøy 16. august klokka 14. Så drar programleiarane vidare til Randaberg og sender ein time derfrå. Slik vil vi reise innom to kommunar kvar einaste vekedag fram til 31. august.

Programleiarane Mari Friestad og Øystein Ellingsen lover å komme tett på valkampen ute blant folk i alle dei 23 kommunane i Rogaland. Her blir det duellar, folkeopplysning, appellar og humør. Både lokalpolitikarar og vanlege veljarar skal få komme til orde.

– Dette valet handlar ikkje om Erna, Jonas og Sylvi. Det tar vi på alvor, og derfor lager vi sendingar frå kommunane der slaget står, seier Øystein Ellingsen.

Mari Friestad legg til at målet også er å gjere det nære og lokale interessant for fleire enn dei som bur i kvar enkelt kommune.

– Og så håpar vi at lokalbefolkninga stiller opp. Det er kjekt når det blir litt liv og røre rundt oss, seier Friestad.

Ruta er slik:
Onsdag 16. august: Kvitsøy og Randaberg
Torsdag 17. august: Bjerkreim og Gjesdal
Fredag 18. august: Sola og Sandnes
Måndag 21. august: Lund og Sokndal
Tysdag 22. august: Eigersund og Hå
Onsdag 23. august: Hjelmeland og Strand
Torsdag 24. august: Time og Klepp
Fredag 25. august: Stavanger og fylkeskommunen
Måndag 28. august: Utsira og Haugesund
Tysdag 29. august: Vindafjord og Bokn
Onsdag 30. august: Sauda og Suldal
Torsdag 31. august: Karmøy og Tysvær