Norges geologiske undersøkelse (NGU) gjennomfører i desse dagar den største undersøkinga frå lufta i Norge nokonsinne.
Med to småfly med innebygde målesensorar skal kyst- og havområda under lupa. Dette for å mellom anna kartlegga berggrunnstrukturen i Nordsjøen, avdekkja radonfaren på Vestlandet og eventuelle sprekksoner i fjellet.
Flyr lågt
Og for dei som vil ta ein kikk på flya, er sjansane store. Pilotane flyr nemleg i ein høgde på berre 60-100 meter over bakke- og havnivå.
- Me flyr såpass lågt at me blir lagt merke til. Faktisk har fleire som har sett oss trudd me har vore ute av kurs og på veg til å styrta. Derfor er det viktig å formidla at dette er noko me må gjera i jobben vår, seier geofysikar Odleiv Olesen i NGU til nrk.no
Mykje av jobben gjort
NGU har til nå flydd frå Sunnfjord i Sogn og Fjordane til Karmøy i Rogaland. Det betyr at ein fjerdedel av jobben er gjort.
- Akkurat nå er me i sving i området kring Sveio i Hordaland og Karmøy. Frå 20. juli flyr me frå Sola og sørover til Egersund, seier Olesen.
Målet er å kartlegga heile kystområdet, frå Sunnfjord i nord til Mandal i sør, i tillegg til store delar av Nordsjøen.