– Dei oransje skjerfa skal minne folk om at det er mange som ikkje ser fram til julefeiringa, fordi dei ikkje har nokon å dele den med, seier gateprest Per Arne Tengesdal i Stavanger bymisjon.
– Og skjerfa skal ikkje berre henge der. Er det nokon som frys, eller kjenner nokon som gjer det, så ta endeleg med eit skjerf, seier Tengesdal.
Årleg aksjon
Kvart år, når det nærmar seg jul, drar Kirkens bymisjon i gang denne aksjonen i byane rundt om i landet. I dag, Tysdag 28. oktober, er tilsette og friviljuge ute i Stavanger sentrum for å skape blest om innsamlinga.
– Me skal dele ut mandarinar og informasjonsmateriell til folk, slik at dei blir merksame på alle dei som treng hjelp, seier Tengesdal.
Sjølve innsamlinga skjer via SMS, der gjevarane kan gi to middagar til ein pris av totalt 80 kroner.
Planane framover
I november skal bymisjonen ha stand inne på kjøpesenteret Arkaden i Stavanger sentrum og søndag 7. desember er det tid for den årlege julekonserten i St. Petri-kyrkja, «Me jule deg opp» i samarbeid med Rogaland Teater.