– Me treng ein ny tiltakspakke frå regjeringa, og me treng den no. Viss me får pengar, kan me starta med vedlikehaldsarbeid på måndag, seier ordførar i Sandnes, Stanley Wirak.
Ordførar i Sandnes, Stanley Wirak, meiner regjeringa må løyve meir pengar til vedlikehald for å skape fleire arbeidsplassar.
Foto: Ole Andreas Bø / NRKEin av tre arbeidsledige i landet er utanlandske statsborgarar, og i Sandnes er det endå fleire. 39 prosent av dei om lag 2000 som står utan jobb i kommunen er utanlandske statsborgarar, dei fleste av dei kjem frå Aust-Europa.
– For to år sidan var det mykje lettare å få jobb, men no er det vanskeleg. Eg kjenner mange som har mista jobben, spesielt i byggebransjen, sa Bartosz Grochowski frå Polen.
Sandnes er hardt råka
Det er nedgangen i byggeaktiviteten som får mykje av skulda for at mange arbeidsinnvandrarar har mista jobben.
– Bakgrunnen er jo at det har vore stor arbeidsinnvandring dei seinaste åra av handverkarar og bygningsarbeidarar. Når byggeaktiviteten no stoppar opp, så er det mange av desse som har mista jobben, seier Wirak.
Regjeringa la inn ei redningspakke til oljefylka i Statsbudsjettet. Fleire prosjekt, og ei storstilt offentleg opprusting skal få ledige ut i jobb. Men det trengst meir, meiner Wirak.
- LES OGSÅ:
Bartosz Grochowski er blant dei som no lærar seg norsk for å vera meir attraktiv på arbeidsmarknaden.
Foto: Eirik Gjesdal / NRKByrjar å sjå konsekvensane
Arbeidsløysa i Sandnes er no på 4,9 prosent, og kommunen begynner å sjå konsekvensane av at fleire står utan jobb.
– Me merkar det på skatteinngangen, og me kjem nok også til å merka det på sosialbudsjettet etter kvart, seier Wirak.
Truls Nordahl er direktør i NAV i Rogaland
Foto: Ine Eftestøl / NRKFor fleire av dei som no har mista jobben kan få problem med å koma seg ut i arbeid igjen, trur NAV.
– Mange av desse er i den gruppa som me kallar langtidsledige, altså at dei har vore ledige i lengre enn seks månadar. Denne gruppa manglar gjerne utdanning, og norskkunnskapar. Og for dei er det spesielt utfordrande no, seier direktør i NAV i Rogaland, Truls Nordahl.
– Det er ikkje enkelt. NAV gjer jo det dei kan, men når det ikkje er arbeid i denne regionen, så er det ikkje arbeid. Difor må me skapa dei arbeidsplassane, seier Wirak.
- LES OGSÅ:
Blir verande i Norge
Og det er fleire som håpar på nye arbeidsplassar. For i det polske miljøet i Rogaland fortel dei at det er fleire som blir verande, sjølv om dei har mista jobben.
– Dei ventar, og håpar på at tidene blir betre. For dei ynskjer å bli verande her, dei ynskjer ikkje å reise tilbake til Polen, seier Ryszard Sikora.
