Torsdag ettermiddag blei det igjen trafikkaos i Mekjarvik og store delar av Randaberg då sterk vind tvang ferja over Boknafjorden å legga til kai i Mekjarvik.
Vanlegvis er det berre dei som skal over til Kvitsøy som står i kø på denne ferjekaien nå som ruta til Skudeneshavn er lagt ned.
Farlege situasjonar
Men når ferjene over Boknafjorden må legga kursen om Merkjarvik, oppstår det kaos.
Særleg kaotisk blir det for dei som til vanleg bruker kaia for å komma seg til Kvitsøy, ifølgje Kvitsøy-ordførar Mirjam Ydstebø.
– Me som skal til Kvitsøy bli stoppa av masse trafikk, og det oppstår lett farlege situasjonar ved at ein sjansar på å køyra forbi for å rekka ferja, seier Ydstebø.
– Kva bør ein gjera med dette?
– Eg blir skuffa over at ein ikkje klarer å organisera dette på ein god måte. Det må vera rutinar slik at vegvesenet og politiet kan bli varsla, slik at nokon kan dirigera trafikken.
Vegvesenet: – Me har rutinar
Ordføraren har tatt opp problemet med Statens vegvesen både i fjor haust og året før utan at noko har skjedd, ifølgje ho sjølv.
Men Statens vegvesen seier det i dag finst rutinar for varsling, og at dei i går var ute med folk som dirigerte trafikken.
– Men det er klart at når trafikken hopar seg opp før me rekk å komma ut kan det sjå kaotisk ut i starten. I tillegg må me snu skilta som viser veg for E39 og gjerne varsla fleire før me kan ta til med dirigeringa, seier byggeleiar i vegvesenet, Eivind Stangeland.
– Er rutinane gode nok i dag?
– Det kan me godt stilla spørsmål om. Men det er dei rutinane me har innarbeida og prøver å gjennomføra på best mogleg vis.
Stangeland legg til at vegvesenet vil vurdera om dei skal senda ut fleire folk til å dirigera trafikken neste gong ferjene over Boknafjorden må legga om kursen til Mekjarvik.