EU-kontroll: Kvar fjerde bil hadde bremsefeil

Feil på bremser, lys og hjuloppheng er blant dei aller vanlegaste feila på norske bilar. Desse feila blir avdekte år etter år.

Meir enn kvar fjerde feil er knytt til bremser.

– Det kan vera for slitne bremseklossar og bremseskiver, rusa på bremseskiver eller bremserøyr, eller for svak bremseeffekt, seier Leif Magne Halvorsen i Statens vegvesen.

Nesten 1,5 millionar norske bilar var på EU-kontroll i fjor. 689.000 av desse måtte utbetra manglar før køyretøyet kunne bli godkjent.

Bremsar for lite

Øyvind Aasen er bilmekanikar hos Vaterland Auto i Fredrikstad. Han har EU-kontrollert bilar i mange år.

Aasen seier at fleire elbilar gjer at dei oftare enn før ser at bremsene rustar.

Rustne bremseskiver er ifølgje NAF eit problem på alle nye bilar. Elbilar er mest utsette fordi bremsene knapt nok blir brukte.

– Elbilen bremsar av seg sjølv når du slepper gassen. Det gjer at bremsene blir lite brukte, som fører til at bremseskivene rustar, fortel Aasen.

– Har du nokon gode råd for å unngå det?

– Det blir å bruka bremsene aktivt litt innimellom, sånn at du kjenner at bilen bremsar kraftig ned. Då vil du få mindre rust på bremseskivene.

Unødvendige lysfeil

Feil med lykter, refleksar og anna elektrisk utstyr er noko kontrollørane ser ofte.

– Feil med lys er i mange tilfelle unødvendig å oppdaga først på EU-kontrollen. Me oppmodar alle til å jamleg sjekka om lysa på bilen fungerer, seier Halvorsen.

Er ingen garanti

Ein EU-kontroll er for å sjekke tryggleiken og miljøomsyn når bilen er inne. Den seier ikkje noko om behovet for reparasjon eller tryggleiken i framtida.

– Ein godkjend bil er godkjend der og då. Det betyr ikkje at det ikkje kan oppstå ein feil om ei veke eller om tre månader, seier seksjonsleiar Einar Eskilt i Statens vegvesen.

Det blir ikkje gjennomført reparasjonar under ein EU-kontroll, og både Statens vegvesen og bilmekanikar Aasen meiner det er viktig å følgja opp med service og reparasjonar mellom EU-kontrollane.

– Me vurderer tilstanden her og no. Me kan ikkje setja opp feil som me trur kan bli eit framtidig problem, seier mekanikaren.

Positiv

Då NRK besøkte Vaterland Auto, kom Bjørn Winther Johansen innom for å henta bubilen sin, som hadde vore på EU-kontroll.

Verkstaden hadde ingenting å seia på bilen.

– Eg synest det er fint med EU-kontrollar. Då veit me at ting er sikkert og i orden. At det skjer annakvart år er passeleg, tenkjer eg.