– Bommane startar opp klokka 12, seier dagleg leiar i Bypakke Nedre Glomma Jostein Haug.
Frå 24. januar 2024 skal 25 bomstasjonar hente inn pengar til diverse samferdselsprosjekt i Bypakke Nedre Glomma fase 2.
6,8 milliardar kroner skal til saman hentast inn gjennom bompengar.
– Men vi får eit fantastisk transportsystem i regionen. Prosjekta i bypakken har vi jobba med i fleire tiår, og vi er glade for at vi endeleg kan starta bygginga dei neste åra, seier Haug.
Desse satsane gjeld
For personbil vil følgjande satsar gjelde:
- Full pris: 32 kroner
- Med bombrikke: 25,60 kroner
- Nullutsleppskøyretøy: 12,80 kroner
For fossile køyretøy som veg meir enn 3,5 tonn vil kvar passering koste 64 kroner. Nullutsleppskøyretøy over 3,5 tonn kan køyre gratis gjennom bomringen.
Det vil bli envegs innkrevjing. Det betyr at du berre betalar for passering av bomstasjonane i ei retning.
Innanfor ein tidsperiode på ein time må du berre betale for ei passering.
På kvardagar mellom klokka 17.30 og 20.30 kan du køyre så mange gonger du vil gjennom bomringen for prisen av ei passering.
Per bil kan du maks betale for 70 passeringar i månaden. For ein personbil med bombrikke vil det utgjere følgjande:
Fossildrive: 1855 kroner.
Nullutsleppskøyretøy: 896 kroner
Lanserer busstilbod
I tillegg til å skaffe finansiering til prosjekta, skal bomringen også fungere som eit restriktivt biltiltak, forklarer Jostein Haug.
– Vi vil ha fleire til å gå, sykle og reise kollektivt. Då vi fjerna bommane i Fredrikstad i mai gjekk biltrafikken opp med nesten ti prosent.
I eit forsøk på å få folk over på kollektivtrafikk, blir det lansert billigare bussbillettar tidleg 2024.
Frå 17. januar til 21. februar vil ein enkeltbillett koste 10 kroner og 30 dagars periodekort i heile Nedre Glomma-regionen koste 100 kroner.
– Det er eit tilbod til dei som vil bruke dette høvet til å endre reisevanane sine. Kanskje nokon finn ut at bussen er eit transportmiddel dei ønskjer å halde fram med å bruke, seier Haug.