Kunstgjødsel kan bli dyrare: – Skuffande

– For meg er mineralgjødsel veldig viktig, seier Mikkel Bakkegard.

Han er bonde på Lena i Østre Toten, og dyrkar både kveite, bygg og kålrot. I tillegg har han rundt 7500 høner.

Med nesten 1000 mål dyrka mark, går det med ein del kunstgjødsel i året. Dette er i tillegg til all hønsemøkka han også gjødslar med.

– Eg har ikkje i nærleiken av nok gjødsel som eg treng til planteproduksjonen min. Difor kjøper vi relativt mykje mineralgjødsel òg.

– Grovt rekna er det vel kanskje rundt 80 tonn, seier han.

Men no kan prislappen på kunstgjødsel bli endå dyrare.

• Les også om bonden Eirik som måtte bruke utvatna kumøk som gjødsel.

Foreslår klimaavgift på gjødsel

Onsdag la regjeringa fram sitt forslag til statsbudsjett for neste år.

Blant tiltaka for å styrke klimapolitikken, står det mellom anna at regjeringa vil sende ut eit forslag om å innføre klima- og miljøavgift på mineralgjødsel på høyring.

– Vi har god erfaring med å prise utslepp, seier statssekretær Ellen Reitan (Ap) i finansdepartementet.

– Ei avgift på mineralgjødsel vil gi insentiv til å redusere bruken av mineralgjødsel og bidra til reduserte klimagassutslepp og miljøforureining, meiner ho.

Men bondelagorganisasjonar meiner dette ikkje er eit godt forslag.

Leiar i Innlandet bondelag, Camilla Rostad, meiner det finst andre, meir effektive klimatiltak regjeringa heller burde peika på.

– Eg undrar meg over korleis ein kan foreslå å legge ei avgift på ein så viktig innsatsfaktor for å auke matproduksjonen, seier Rostad.

– Det er jo litt skuffande. Vi trudde jo at dei tok dette alvorleg i forhold til det oppdraget som vi har blitt gitt med å auke sjølvforsyningsgrada.

Ho viser til at sjølvforsyningsgrada i Noreg skal opp frå 40 prosent til 50.

– Vi ønsker å produsere mest mogleg, best kvalitet og mest mogleg utbytte per areal. Da er ikkje det å ta bort kunstgjødsel eit godt klimatiltak.

Bondebladet har også omtalt saka.

Vil kompensere

Om avgifta blir innført, meiner ho regjeringa bryt klimaavtalen som landbruksnæringa inngjekk med regjeringa i 2019.

– Ved å innføre avgifter på noko som dei har sagt at dei ikkje skal innføre avgifter på, så bryt dei faktisk avtalen, seier Rostad.

Dersom avgifta blir ein realitet, fryktar bondelagsleiaren det kan gå ut over sjølvforsyningsgrada og matprisane.

Men bøndene vil bli kompensert gjennom jordbruksoppgjeret, seier statssekretær Reitan.

Ein slik kompensasjon skal likevel ikkje svekke motivasjonen til å kutte utslepp.

– Vi vil vere opptekne av at kompensasjonen tek vare på insentiva for å få ned utsleppa frå jordbruket, seier Reitan.

• Les også om gjødselregelverk som skal skjerpa spreiekrava i landbruket

– Ikkje treffsikkert

Å gjere klimatiltak i landbruket er viktig meiner bonden på Lena, men han meiner denne avgifta er feil veg å gå.

For mange bønder finst det ikkje alternativ til kunstgjødsel, seier han.

– I praksis har dei fleste bønder ingen alternativ til mineralgjødsel. Alternativet er jo som regel husdyrgjødsel. Nokon har noko husdyr, men langt frå nok til å dekke heile behovet.

Likevel har han ingenting imot at regjeringa vil sende forslaget ut på høyring.

– Det er som regel greitt å undersøke ting, men eg meiner at ei avgift på mineralgjødsel er feil veg å gå.

– For det er ikkje spesielt treffsikkert for å få eit meir miljøvennleg jordbruk, seier han.