Nye råd om eigenberedskap: – Kvar skal ein ha det?

Onsdag morgon kom Direktoratet for samfunnstryggleik og beredskap (DSB) med skjerpa råd for eigenberedskap.

Dei anbefaler folk no å dekke eigne grunnleggjande behov i sju dagar ved ein eventuell krise. Tidlegare har råda vore å klare seg i tre dagar.

– Kvar skal man ha det? spør Emma Fjell Olsen.

Ho bur i ein av studenthusa til Studentskipnaden i Oslo, der deler ho ein leilegheit på 32 kvadratmeter med kjærasten.

Ein vassdunk bak skohylla

Ho viser fram den vesle leilegheita. Det er ikkje mykje ekstra plass.

Skapa er fulle av det ein treng til kvardagen, som tallerken, koppar, tørrmat, klede, sko og bøker til studiane.

I skapet i gangen får vi auge på ein vassdunk.

– For litt sidan var det ein bakterie i drikkevatnet som gjorde at vi måtte koke vatnet vårt. Da kjøpte vi ei femlitersflaske.

Ho fortel at dei fylte på etter at vatnet vart bra att, i tilfellet det same skulle skje på nytt.

– Vi har jo ikkje den største lagringsplassen, i forhold til foreldra våre som bur i hus.

20-åringen seier at ho forstår at råda må oppdaterast sidan verda ser annleis ut enn da sist råda vart gitt. Samstundes synest ho at det er litt skummelt å tenke på at ein krise kan oppstå.

Unge vaksne minst førebudd

Nordmenn skal vere førebudd på naturkatastrofar, cyberangrep, anna angrep utanfrå, langvarig straumbrot eller pandemi.

Direktøren for DSB, Elisabeth Aarsæther seier at deira undersøkingar viser at unge vaksne er dei som er minst førebudd.

– Eldre hugsar 2. verdskrig og er meir førebudd enn unge, så dei kan hjelpe unge med å forstå alvoret. Men unge er flinkare til å vere kritiske til informasjon.

Studievenninnene Maria Bjørnebye-Borgaas, Solveig Jørpeland Lunde og Mille Espeland fortel at dei ikkje er heilt førebudd for ein eventuell krise.

– Akkurat no har eg ein gammal filadelfiaost og litt knekkebrød i skapet mitt, ler Jørpeland Lunde.

Dei tre 20-åringane studerer statsvitskap og er klar over verdsbilete.

– Krigen i Ukraina, og det som skjer i Israel og Palestina.

Dei fortel at de for dei handlar om plass – og det er det lite av.

Trongt om plassen

Ein annan student som har kjent på det same, er Fredrik Sarai som studerer informatikk på Universitetet i Oslo.

– Eg har så vidt plass til å ha vanlege klede, og kanskje tre dagar med mat.

22-åringen bur i kollektiv med to andre. Rommet hans er åtte kvadratmeter.

Han fortel at han har eit skap på kjøkkenet og ei hylle i kjøleskapet.

Sarai meiner det står om eigenberedskap eller ting til kvardagen, og da har valet blitt det siste.

– Det at dei gjer det, må vere eit signal for at det er større sannsyn. Og da blir eg meir redd.

Ein som heller ikkje har plass til mat og vatn for ei veke, er student Odin Foss Sjøtun.

Ikkje har han pengar til det heller, seier han.

– Det er rett og slett dyrt. Eg trur eg hadde klart det med tre dagar, sånn det var før, men sju dagar trur eg blir vanskeleg.

Foreslår samarbeid

Henrik Graarud, bustaddirektør i Studentskipnaden i Oslo (SiO), seier til NRK dei har stor forståing for at studentane slit med lagringsplassen. Han kjem samstundes med ei oppfordring.

– Me anbefaler å skaffe seg og lagre det ein kan, og eventuelt gå saman med andre om å lagre det aller mest nødvendige, seier Graarud.

Dei skal no gå gjennom sine rutinar og retningslinjer.

– For å sjå om det er noko som bør bli justert, for å kunne gjere denne handteringa enklare for studentane.