Styringsrenta har vore på rekordlåge 0 prosent sidan 7. mai i fjor, og det vil den halde fram med til over sommaren, viser Noregs Bank sitt nyaste rentevedtak.
– Slik vi vurderer utsiktene og risikobildet, vil styringsrenta mest truleg bli sett opp i september, seier sentralbanksjef Øystein Olsen, som spår fire rentehopp på eitt år.
Sentralbanksjefen har tidlegare varsla at renta vil auke gradvis frå andre halvår i 2021, og at den i første omgang vil bli sett opp til 0,25 prosent. Men først vil dei sjå «klare teikn til at forholda i økonomien normaliserast».
Vil dempe bustadprisveksten
Noregs Bank trur gjenopninga av samfunnet vil gi eit løft til den norske økonomien. Dei anslår at aktiviteten i fastlandsøkonomien er tilbake på nivået frå før pandemien i løpet av tredje kvartal i år, som følge av auka konsum og investeringar.
Derfor har rentebana blitt revidert og er høgare enn Noregs Bank anslo i mars.
– I starten av året bidrog auka smitte og strenge smitteverntiltak til å bremse innhentinga. Utover våren har tempoet i vaksineringa auka, og myndigheitene har starta ein gradvis gjenopning av samfunnet, sa Olsen under pressekonferansen.
– Er de redde rentehevinga kan føre til smell i bustadmarknaden?
– Vi tar omsyn til strukturen i norsk økonomi og at gjeldsgrada er høg i norske hushaldningar. Men rentehevingane vil vere ein faktor som dempar bustadprisveksten, seier Olsen.
Hvor har du råd til å kjøpe bolig?
Boligkalkulatoren er utarbeidet av NRK i samarbeid med boligportalen VIRDI
Boligkalkulatoren er nå utdatert og derfor ikke tilgjengelig.
Bruk av heimekontor og at folk har brukt pengar på bustad i staden for reise har påverka bustadmarknaden, understrekar sentralbanksjefen.
– Sårbarheita i økonomien er hushaldssektoren. Det er ein sårbarheit og eit felt vi har stor merksemd rundt.
Nye virusvariantar skapar usikkerheit
Noregs Bank legg vekt på at tempoet i koronavaksineringen har auka. Over 2 millionar nordmenn har no fått første dose, noko som vil føre til ein meir normal kvardag.
Direktør for pengepolitikk i Noregs Bank, Ole Christian Bech-Moen, seier veksten i utlandet også har vore noko sterkare enn tidlegare anslått.
– Det er utsikter for at vi er tilbake på nivået frå før pandemien i løpet av hausten. Men nye og smittsame variantar av viruset skaper usikkerheit om dei økonomiske utsiktene, seier han.
– Rett å heve styringsrenta
Noregs Bank understrekar at den lange perioden med låge renter aukar faren for at finansielle ubalansar bygger seg opp.
– Komiteens vurdering er at utsiktene og risikobildet samla sett framleis tilseier ein ekspansiv pengepolitikk. Vidare lettingar i smitteverntiltaka vil bidra til at forholda blir meir normale. Det tilseier at det snart vil vere rett å heve styringsrenta frå dagens nivå, seier Olsen.
Styringsrenta var på 1,5 prosent før koronapandemien trefte i 2020. Målet er at renta skal opp igjen til det same nivået innan første halvdel av 2025, ifølge Noregs Bank sine prognosar.
- Økonomikommentator Cecilie Langum Becker: