– Vi har avhøyrt 21-åringen i dag tidleg, det er alt eg kan seie no, seier Kim Hild, pressetalsperson i Syd politiregion.
Politiet i Skåne stadfestar at mannen kasta to gjenstandar inn på baren 19Hundra i Ängelholm og at han er arrestert. Dei opplyser også at bombegruppa har sikra seg spor på staden, men vil ikkje gå ut med meir informasjon om hendinga, som skjedde rundt klokka 01 natt til søndag.
Ei kvinne vart skadd etter at ho vart treft av glasbitar frå gjenstandane då dei trefte bakken.
– Han drog fram ein kjøkkenkniv
Ifølge nettsida til utestaden kasta mannen fleire brannbomber og hadde på seg noko som likna et bombebelte med elektronikk. Bombene tok aldri fyr og bombebeltet gjekk aldri av.
Eigaren av baren, Jim Nilsson, var DJ og vart oppmerksam på ein mann som stod utanfor baren. Han tok opp jakta på mannen då han rømte frå staden. Mannen ropte noko til Nilsson, utan at han greidde å forstå kva han sa.
– I det eg trur han skal ta opp ein pistol, så står han der plutseleg med ein stor kjøkkenkniv, fortel eigar Jim Nilsson til avisa Expressen.
Han skildrar kniven som omlag 30-40 centimeter lang.
Sikkerheitspolitiet Säpo er informert om hendinga, men er ikkje kopla inn i saka.
