Stortingsrepresentant Astrid Nøklebye Heiberg er død, opplyser Høgre si pressevakt til NRK.
Heiberg vart 83 år.
I 2018 vart Heiberg den eldste fast møtande stortingsrepresentanten nokon gong.
Astrid Nøklebye Heiberg hadde fleire sentrale verv i Høgre i 1980- og 1990-åra. Ho var mellom anna leiar for Høyrekvinners Landsforbund.
Ho var og forbruker- og administrasjonsminister i 1986 og partiet sin 1. nestleiar i 1990–1991.
Då Nikolai Astrup gjekk inn som minister i Regjeringa i 2018 vart Astrid Nøklebye Heiberg fast representant for Høgre på Stortinget sidan ho var 1. vara for Oslo Høgre.
Heiberg var utdanna lege og hadde doktorgrad i medisin.
Ho var president i Det internasjonale forbundet av Røde Kors- og Røde Halvmåne-foreninger frå 1997 til 2001.
Heiberg var statssekretær to gonger. Sist gongen vart ho statssekretær i Helse- og omsorgsdepartementet i ein alder av 77 år.
Solberg: – Ho har betydd mykje for meg
– Astrid var ei av dei klokaste damene eg kjenner. Ho har betydd mykje for meg, frå ho på 80-talet var i Willoch-regjeringa, leiar i Høgrekvinnene og i Høgre si leiing; til ho var statssekretær for Bent Høie og fornya sin politiske deltaking som stortingsrepresentant. skriv Erna Solberg på si Facebookside.
– Ho hadde eit brennande hjarte for menneska rundt seg. Ho var opptatt av at alle skulle ha det bra - og snakke om det som ikkje var bra. Astrid fekk folk til å opne seg. Ho hadde eit blikk som sa: Eg ser deg, skriv Solberg.
