– Vi har funne ein omkomen person. Personen er ikkje er identifisert, og har blitt sendt til obduksjon for å finne ut kva som har skjedd, seier politiadvokat Christina Sve Hagen.
Undersøkingane av branntomta vil halde på i ei tid framover. Krimteknikarar og søkehund arbeidde der gjennom fredagen.
Var sakna etter brannen
Det var like før klokka 14.00 torsdag at politiet melde om brannen i ein bustad på Sandsøya i Sande kommune på Sunnmøre.
Ein person blei sakna i etterkant av brannen.
Det var to personar registrert på adressa. Ein annan person tok seg ut av bustaden.
Uklar brannårsak
Einebustaden var overtent då naudetatane kom til staden, men brannvesenet fekk etter kvart kontroll over brannen.
– Bustaden er fullstendig nedbrent, sa operasjonsleiar i Møre og Romsdal politidistrikt, Leif Arne Mork.
Det er for tidleg å seie noko om brannårsaka.
– Vi håper at kriminalteknikarane kan vere med på å gi eit svar på det, seier politiet.
Jobba for å hindre spreiing
Brannvesenet arbeidde med å kjøle ned ei driftsbygning i nærleiken for å hindre at brannen skulle spreie seg dit.
Ferjesambandet Larsnes-Åram-Voksa-Kvamsøya vart innstilt ein periode på grunn av at ferja blei brukt i samband med utrykkinga.
