Kotimaa
Buskerudin Numedalissa kolme ihmistä vahingoittu tänä aamuna puukotustappauksessa. Poliisi oon ilmoittannu, ette yksi haavoittunheista oon itte puukottaja, ja toinen uhriista taas hänen akka. Akka oon kriituisässä tilassa, ja viety Ullevålin sikhuushiin.
Poliisi ei vielä tieđä tevon motiivii, mutta tekkiijä oon heiđän hallussa.
Tääpänä alkkaa kans Kongsberg-tappauksen oikkeuđenkäynti. Tappaus koskee 38-vuođen ikhäistä Espen Andersen Bråthenia, joka hyökkäs usheen ihmisen kimpphuun piiliin ja pyyvin kans viimi oktooperikuussa. Nelje vaimoo ja yksi mies kuoli hyökkäyksessä.
Puolustaja Fredrik Neumann sannoo NRK:le, ette Bråthen oon vakavasti mielisairas, jonka kans oikkeuspsykiatri oon tođenu ennen oikkeuđenkäynttii. Sen takkii hän ja moni muu uskoo, ettei häntä tulla tuomittemhaan.
Tänä vuona Norjassa oon rekordi monta kesätyöpaikkaa, ilmoittaa Nav. Heiđän jälkhiin maassa oon nyt kahđenkertaisesti enämpi työpaikkoi ko ennen pandemiita vuona 2019. Nav- tirehtööri Hans Christian Holte sannoo, ette jos sie et vielä ole hakenu työpaikkaa, tee se nyt.
– Se oon vielä hyvä mahđolisuus saađa kesätyöpaikka.
Moni komuuni oon vihainen maan hallituksele, koska se ei meinaa ottaa eđesvastausta niistä ekstrakuluista, jokka komuuniila oon ollu koronapandemian takia. Sen hallitus oli luvanu nimittäin vielä tehđä marssikuussa, mutta uuđessa staatinbuđsjetti-ehđotuksessa avustus ei kuitenkhaan enhään ollu myötä.
– Het oon rikkonu luppauksensa ja mie olen pettyny, sannoo Sunnfjord-komuunin sananjohtaaja Jenny Følling.
Sananjohtaajan jälkhiin komuuni oon ođottannu 20 miljuunan kruunun avustusta hallitukselta. Aftenpostin jälkhiin Uslu oli taas ođottannu 1,6 miljuuna kruunuu, ja Kristiansand 200 miljuunaa.
Finanssiministeri Trygve Slagsvold Vedum (Sp) puolustaa hallituksen buđsjettiehđotusta, ja sannoo ette komuuniila oon nyt hyvä ekonominen tila.
Mailma
Niin Suomi ette Ruotti oon hakenu Nato-jäsenyyttä. Molemat maat teki päätöksen assiista tällä viikola, ja oon nyt toimittannu viralisen hakemuksen Nato-johtaaja Jens Stoltenbergile.
Turkki oon tällä hetkelä ainua Nato-maa joka oon jäsenyyksii vasthaan. Presidentti Recep Tayyip Erdogon sannoo, ette Turkki tule tyhä hyväksymhään maat militääriliitthoon, jos hänen oman maan turvalisuustillaa ensin paranethaan. Yksi hänen vaatimus oon, ette Suomi ja Ruotti häyđythään lähättäät 30 henkkee takaisin Turkkhiin, missä heitä eppäilhään terrorismista.
Venäjä ei ole ollu mahđolisesta jäsenyyđestä iloinen. Vaikka presidentti Vladimir Putin oonki sanonu, ette maitten jäsenyys ei tule olemhaan suora uhka Venäjälle, meinaa hän, ette jäsenyys oon erheys. Hakemuksen takia Venäjä meinaa nyt muun muassa lopettaat maagassin siiron Suomheen.
Viimi lauvantai iltapäivänä paikalista aikkaa 18-vuođen ikhäinen mies tappoi 10 henkkee ruokaputikissa USA:n osavaltiossa Buffalossa. Poliisi sai tekkiijän kiini samassa tapattuman jälkhiin, ja hän oon nyt poliisin hallussa.
Poliisi eppäilee, ette hyökkäyksen motiivi oli rasismi. Mies oli nimittäin ajanu monta tiimaa tekopaikale, joka makkaa plaanala missä suurin osa asukkhaista on färilissii. Lisäksi hänelä oli päälä militääriuniformu, ja hän oli filmanu tekonsa internetthiin.
Hei sinule!
Har du tanker om saken du har lest, eller innspill generelt til Viikon tärkkeimät uutiset? Send meg gjerne en e-post!