- Eg vil laga Disney-jul

Disney-klassikaren «When You Wish Upon A Star» er blant låtane som popartist Kurt Nilsen og Kringkastingsorkesteret (KORK) har plukka ut eit julealbum som dei no går saman om å laga.

Sjølv om adventstida enda er langt unna, var popartisten og symfonien i dag samla for å leggje siste handa på verket i innspelingsfasen av den kommande juleplata.

– I dag er stemninga ganske nervøs, men vi har det veldig koseleg saman, seier Nilsen til NRK.

- Fantastisk

Det er berre eit lite knippe norske artistar som har fått spele saman med KORK. DDE, Vamp, Bjørn Eidsvåg og Halfdan Sivertsen er blant dei som har gjort det før. No er det Nilsen som får med seg NRK-orkesteret på laget.

• LES OGSÅ: Boy George-slager i ny drakt

– Det er fantastisk å få lov til å spele saman med KORK. I løpet av den siste veka har me laga masse musikk som eg gler meg til å gje ut, seier den tidlegare Idol-vinnaren som blant anna har samarbeida med den amerikanske countrylegenda Willie Nelson.

Ein popartist saman med strykarar - korleis låter det?

– Eg trur det blir fint eg, gliser artisten audmjukt, og får støtte frå KORK-dirigent Nick Davies.

• LES OGSÅ: NRK-TV 50år - kavalkade med KORK

– Sjølv om Nilsen beveger seg inn på eit for han ukjend musikalsk område, gjer han det med glans, seier Davies som er ein av KORKs mest brukte dirigentar på prosjekt som er utanfor det klassiske, blant anna på den kommande Vamp-turnéen og på Nobel-konserten.

Amerikanske svisker

For Kurt Nilsen handlar jula om tradisjonar, og det har også sett sitt preg på hans samarbeid med KORK.

– Eg har ikkje snekra saman nye låtar. Jula er for meg veldig heilag og tradisjonsrik.

Artisten avslører at han har ein forkjærleik for gamle, amerikanske svisker.

– Artistar som Nat King Cole, Frank Sinatra, Dean Martin og Bing Crosby syng jula inn for meg, avslører Nilsen.

«På låven sitter Nilsen»

Samstundes kan han ikkje sjå heilt vekk frå gode barndomsminne, og gjev sine heilt personlege tolkingar av nokre av våre mest kjende songar, som blant anna «Nå tennes tusen julelys» og «Gje meg handa di ven».

• LES OGSÅ:

Kurt Nilsens manager, Jan Fredrik Karlsen har tidlegare spøkt om at julealbumet skal heite «På låven sitter Nilsen», men det er ein tittel som hovudpersonen sjølv ikkje vil gå god for.

– Nei, eg lovar at me skal finna eit anna, meir originalt namn til juleplata, humrar Nilsen, som også har med seg to gjesteartistar: Christel Alsos og Helene Bøksle.

Julekonsert i desember

I tillegg til jule-CD, skal Kurt Nilsen og KORK halda ein fem kvarter lang direktesendt julekonsert på NRK1 den 18.desember. Då skal Nilsen, i tillegg til å syngje, debutera som programleiar.

– Det gler eg meg veldig til, men eg er sjølvsagt nervøs. Meir for praten enn for synginga. Eg reknar med at songgtekstane sit før det, seier 31-åringen.

– Det kjem til å bli stor stas med mykje vakker lyd, lovar han.