Han var ein av dei lovande unge journaliststjernene i prestisjemagasinet The New Yorker. Men måndag vart det avslørt at Jonah Lehrer, som står bak boka «Imagine: How Creativity Works», har fabrikkert sitat.
Boka tar for seg ulike former for kreativitet, men Lehrer vart vel kreativ i arbeidet . Han innrømmer no å ha fabrikkert sitat av Bob Dylan, og å ha samanblanda sitat frå ulike kjelder. Dette vart avslørt i ein artikkel i Tablet magazine, og i går gikk Lehrer av som journalist i The New Yorker.
Resirkulerte artiklar
Journalisten, som har skrive fleire populærvitenskapelege bøker om pyskologi og nevrobiologi, unnskylder seg.
– Løgnene er over no. Eg forstår alvoret i handlingane mine. Eg vil be om orsak til alle eg har skuffa, spesielt redaktørane og lesarane mine, seier han i ei pressemelding.
LES:
For berre ein månad sidan måtte Lehrer unnskylde seg offentleg då det vart klart at han hadde brukt om att eige materiale frå The Wall Street Journal, Wired og andre magasin i The New Yorker. Denne resirkuleringa vart bortforklart som «ein uskuldig feil» av avisa.
Lehrer kunne dermed ha unngått å miste jobben, dersom det ikkje hadde vore for artikkelen i Tablet magazine. Artikkelen vart skrive av Michael C. Moynihan, som blir rekna for å vere ein respektert Dylan-ekspert.
Bob Dylan er kanskje den nolevande musikaren som er mest studert av forskarar og journalistar. Her i Noreg finst det eit eige Bob Dylan-studie på Universitetet i Oslo.
LES:
Sa opp etter knappe to månader
Redaktør i The New Yorker, David Remnick, har mot sin vilje hatt Lehrer i staben sidan resirkuleringa av materiale vart kjent for ein månad sidan.
Då det blei avslørt at Lehrer i tillegg har fabrikkert sitat, gjorde The New Yorker og forlaget bak boka, Houghton Mifflin Harcourt, det klart at dei hadde fått nok av journalisten.
LES OGSÅ:
Etter at Remnick hadde mottatt oppseiinga frå Lehrer, uttalte han dette i ei pressemelding:
– Det er ein utruleg trist situasjon. Men det viktigaste er integriteten til det vi trykkjer og kva vi står for.
Lehrer starta som bloggar for Wired.com, og deretter for The New Yorker sidan 2008. Han vart fast tilsett der for knappe to månader sidan.
Kjent for grundige faktasjekkar
Forlaget vil no trekkje tilbake boka, som er selt i 200.000 kopiar.
Måndag morgon var «Imagine: How Creativity Works» på 105. plass over dei bestselgjande bøkene hos Amazon. Seinare på dagen var den fjerna, skriv The New York Times.
The New Yorker er godt kjent for sine grundige faktasjekkar og sin seriøse journalistikk. Men det er ikkje første gong at eit amerikansk nyheitsmagasin blir tatt for fabrikasjon.
I 2003 vart Jayson Blair tatt for å ha fabrikkert sitat og dikta opp historier i The New York Times over ein lengre periode, i minst 36 artiklar.
LES: Historia bak forfalskinga i The New York Times
Også The New Republic og The Washington Post har hatt tilfeller av fusk. Stephen Glass er kanskje den mest kjente journalisten som er tatt. Han tok det så langt at han rett og slett dikta opp heile historier. Livet hans er festa til film i «Shattered Glass» frå 2003.
For nokre år sidan innrømma norske Bjørn Benkow at han hadde fabrikkert intervju med kjendisar som Bill Gates, Oprah Winfrey og Tom Cruise. Dagbladet og svenske Aftonbladet var blant dei som trykte intervjua hans.
Danmark fekk sin journalistskandale i fjor, då Mads Qvortrup i Dagbladet Information vart avslørt som ein fuskar. Han hevda å ha gjort intervju med menneske som var døde.