Ein veit sjeldan kva ein får når ein går på konsert med Bob Dylan. Men skal ein tru kritikarar og fans som var på «generalprøva» før konsertane i Oslo og Bergen, kan norske fans vente seg ei fantastisk konsertoppleving.
Dylan får kjempekritikkar etter konserten i Odense måndag, som var siste stopp på turnélista før noregsbesøket.
Les:
«Bob Dylan leverte ein av sine beste konsertar nokon sinne», meiner musikkredaktør i Politiken, Erik Jensen.
«Når Bob Dylan og «his band» er i satanisk spelehumør og har strekt seg fram til ei så fenomenal setliste, er det ikkje noko å gjere. (...) Då må ein leggje seg ned på skogens grøne bøneteppe saman med dei bedrevitande dylanologane og mumle sitt fadervår: No, ja og Amen - Bob er betre enn dei alle saman!» skriv han entusiastisk.
– Blant topp ti
Bob Dylan som ung på 60-talet. Hiten 'Blowin' in the wind' er framleis med han på turné, seks tiår etter den vart skrive.
Foto: DEA / APHan er ikkje den einaste som hyllar legenda. Fleire norske fans tok turen til Danmark for å få med seg konserten. Geir Olsen, ein av pådrivarane for Norsk Dylanologisk Sælskab, var på konserten og er på veg med båt til neste Dylan-konsert i Bergen då NRK.no snakkar med han.
– Det var ein utruleg flott konsert, Dylan smilte og såg svært fresh og fornøgd ut. Det er ein svært sprek 70-åring vi ser, seier han.
Olsen har sett cirka 120 konsertar med legenda («Eg slutta å telle etter 100»), og skal få med seg både Bergen- og Oslo-konserten. Han meiner at Odense-konserten er blant topp ti av Dylan-konsertane han har vore på.
Det stemmer bra med skildringa frå nettavisa Musik.guide.dk:
«Overskotet spredde seg til publikum, og sjølv dylanologane, som reiser verda rundt for å sjå og høyre han, var imponert over prestasjonen som idolet ga i Odense. Sjeldan ser vi han så fyrig og forførande», skriv dei.
Høyr:
(Artikkelen held fram under biletet)
Bob Dylan har gjesta Noreg fleire gongar tidlegare. Her i Drammenshallen i 1981.
Foto: Scanpix / SCANPIX– Veit aldri kva ein får
Fleire av hitlåtane frå 'Highway61 Revisited' var med på setlista i Odense. Men det er svært sjeldan at Dylan spelar same setliste to gongar.
Foto: PlateomslagDylan har blitt både hylla og slakta for liveopptredenane sine. Olsen trur det har å gjere med dei ulike forventningane som publikum har.
– Dersom ein forventar seg det same som på plate, blir ein skuffa. Han arrangerer låtane på nytt og songane er forskjellige frå gong til gong live. Blodfansen vil alltid ha spesielle, mindre kjente låtar, men det er sjeldan ein får det, seier Olsen.
Les også:
Fleire av Dylans største hits var med på setlista i Odense, mellom anna «Highway 61Revisited» og «Ballad of a thin man». Dylan spelte tre ekstranummer og avslutta med «Blowin' in the wind».
Ettersom Dylans karriere strekk seg over fem tiår er det ikkje så rart at fansen stridast om dei musikalske høgdepunkta.
Les:
Alle billettane er utselde
Olsen meiner Odense-konserten lovar godt framfor noregsbesøket, men er likevel usikker på kva publikum i Oslo og Bergen kan forvente seg.
– Kva ein kan forvente seg er eit stort spørsmål. Eg har berre opplevd éin gong at han har hatt same setliste på to konsertar, men det er det som er så spanande og difor vi reiser rundt for å få med oss alle konsertane, seier han.
Onsdag 29. juni spelar Dylan på Koengen i Bergen og torsdag 30. juni i Oslo Spektrum. Alle billettane er utselde i Oslo, men i Bergen er det framleis fleire igjen.
Det er del av hans Never Ending Tour, ein uavslutta turné som han starta i 1988. Denne delturnéen starta 16. juni i Irland og blir avslutta 20. august i Bangor, USA.
Les også:
Høyr jubileumssending om Bob Dylan 70 år:
