på Island er no heilt dekt av aske frå vulkanen under Eyjafallajökull. Friluftsmuseet har ei av dei viktigaste samlingane av hus og historiske gjenstandar på Island.
Den 89 år gamle grunnleggaren av museet, Thordur Tómasson, seier han har hatt vonde dagar, men at dei ikkje gjev opp håpet om å vende tilbake og rydde opp.
– Eg lever i godt håp på alle område, dei siste dagane har vore dei verste i livet mitt. Vi bur så tett ved den store vulkanen. Og ingen veit kor lenge det vil stå på, det kan vare heile sommaren, og det kan vere slutt neste dag, det veit ingen, fortel Tomasson.
Uviss skjebne
Skógar Museum er evakuert, vegen inn dit er stengt og verken Thordur Tómasson eller islandske antikvariske styresmakter veit kva oska og smeltevannet har gjort med området.
Thordur Tómasson kan difor ikkje gjere anna enn å vente til oska har lagt seg, og vulkanen roa ned seg før han veit om det er mogleg å opne det populære museet til årets sommarsesong.
Det er uansett ikkje tvil om at det vil ta tid å rydde opp.
– Alt er dekt med oske, oske og oske. Eit lag på to-tre centimeter. Det er eit kjempearbeid å reinse, seier Tómasson.
Viktig samling
Det var Tómasson sjølv som fekk opna friluftsmuseet i 1949, basert på si eiga samling av hus og gjenstandar. Her finst det også ei rekkje arkeologiske kulturminne, som viser korleis dei første islendingane klorte seg fast i landet av eld og is.
89-åringen har framleis ikkje slutta å samle inn ting som kan vise korleis islendingane har bygd, budd, fiska og drive landbruk gjennom tidene.
– Det er av stor verdi for samfunnet. I fjor hadde vi 45.000 gjestar, men kor mange det vert til sommaren veit ingen, seier Thordur Tómasson.