Funkygine om ekspedisjon i Canada: – Eg har ikkje lyst

17. juni reiser Jørgine «Funkygine» Massa Vasstrand og Vegard Harm på det som ifølgje dei kan oppfattast som den største utfordringa i livet deira så langt.

Nemleg ekspedisjon i villmarken i Yukon i Canada.

– Eg og Vegard har snakka om det, og det er jo berre Lars Monsen-type-folk som drar på ekspedisjon. Og ikkje slike som meg og Vegard. Så vi er jo veldig spente da.

Det fortel Vasstrand til Lars Monsen i podkasten «Monsens univers».

I episoden snakkar ho også om da ho gav si eiga morsmjølk til leiarhunden i hundespannet sitt, og om si turbulente ungdomstid i Italia.

Til vanleg er ho personleg trenar og influensar, men 35-åringen er også kjent gjennom programleiarrolla i «Norges tøffeste» og gjennom VGTV, der ho og Vegard Harm har hatt fleire sesongar saman.

Hissig elg

Denne gongen skal duoen altså på ein mini-ekspedisjon i ei veke der dei skal gjere alt frå å padle, sykle, ri, gå og kanskje også klatre.

Yukon, som er eit territorium i den vestlege delen av Canada, er kjent for stupbratte fjell, vill natur og rikt dyreliv. Men også for å vere eit «bjørneland».

Det sistnemnde er noko ho skulle ha vore forutan.

– Eg har ikkje lyst til å reise til Canada. Eg er glad i natur, i å bevege meg, eg er ikkje redd for ei fysisk utfordring. Men å bevege meg i eit område med bjørn ...

Frykta er større enn gleda

For sjølv om Vasstrand er kjent for å utfordre seg sjølv og prøve ut nye ting, blant anna har ho deltatt i Femundløpet og VM i hundekøyring, så innrømmer ho at dette kjennest annleis ut.

Vasstrand legg deretter til at denne turen, som er så langt unna og på mange måtar er så fjernt for ho, skapar meir frykt enn glede.

– Så eg sit liksom ikkje og gler meg til dei store naturopplevingane, dei fysiske påkjenningane og meistringskjensla.

– Eg sit berre og tenker på at eg er skikkeleg redd for å bli spist av bjørn og ikkje kome heim til ungane mine, seier ho og er tydeleg rørt.

– Spill død

Når Monsen spør Vasstrand kva dei gjer for å førebu seg, svarer ho:

– Vi reiser openbert ikkje aleine. Eg er generelt ikkje så glad i å reise ut av Noreg. Så vi skal ha med oss ein guide som er født og oppvakse i dette området.

Monsen foreslår vidare å ha med seg peparspray, og å leggje seg i fosterstilling om ein bjørn kjem i mot.

Noko Vasstrand reagerer med skrekk og gru på.

– Det aller beste rådet eg kan gi deg om ein bjørn kjem i full fart mot deg, er å leggje deg i fosterstilling. Gløym alt saman, og kryp deg saman og beskytt hovudet og magen, for statistisk sett er det to område bjørnen tygg lite grann, og det er på hovudet og i magen, seier han mens Vasstrand ristar på hovudet og ler.

– Så om du klarer å beskytte dei to plassane så er du på god veg, seier Monsen.

Monsen sjølv møtte på ein bjørn da han var på villmarksekspedisjon «Canada på tvers» i 2012. Han følgde ikkje sitt eige råd om å leggje seg ned i fosterstilling.

Sjekk video under:

Høyr meir i podkasten «Monsens univers».