– Eit vengjeklipt Vikingtidsmuseum.
Det seier museumsdirektør Håkon Glørstad om kostnadskutta Universitetet i Oslo og Statsbygg måtte legga fram i ein ny rapport til Kunnskapsdepartementet.
Bakgrunnen for rapporten er at departementet ønsker at det nye museet på Bygdøy blir gjennomført til ein prislapp på 2,4 milliardar kronar.
Slik det var planlagt låg museet an til å sprenga den ramma med om lag ein milliard kronar.
BEKYMRA: Direktør for Kulturhistorisk museum, Håkon Glørstad, er uroleg for at usikkerheita rundt Vikingtidsmuseet vil gå utover sikkerheita til vikinggjenstandane.
Foto: Petter Sommer / NRKI rapporten blir tre alternativ lagde fram, basert på det opphavlege konseptet.
Det billigaste av dei overskrid budsjettet med over 600 millionar kronar.
– Ein risikerer å sitta igjen med eit svært redusert museumsbygg utan å ha lykkast med innsparingar, seier Glørstad.
I rapporten blir det konkludert med at prosjektet sitt mål om å sikra dei uerstattelege kulturhistoriske gjenstandane for ettertida blir krevjande.
– Det er urealistisk med drastiske kostnadsreduksjonar i det noverande prosjektet, seier Glørstad.
I samband med kuttkravet bestilte Kunnskapdepartementet ein uavhengig rapport for å vurdera prosjektet og kuttforslaga.
I rapporten seier Holte Consulting seg einig med Glørstad.
Der er vurderinga at konseptet ikkje kan gjennomførast innanfor budsjett viss ein både skal sikra gjenstandane og gi god tilgang til publikum.
Eit fjerde alternativ som blir lagt fram i rapporten kan gjennomførast innanfor budsjett, men inneber eit heilt nytt konsept og auka risiko for vikingsamlinga si sikkerheit.
Dette fordi alternativet vil forseinka det nye museet med tre til fem år.
Dette er i konflikt med ei internasjonal ekspertgruppe si sterke anbefaling.
I 2012 peika dei på eit umiddelbart behov for å sikra vikingskipa betre enn det tilfellet var i det dåverande Vikingskiphuset.
