Uvisst når den svensk­norske astro­nauten kjem tilbake til jorda

Etter planen skulle svensknorske Wandt og tre andre astronautar ha returnert frå den internasjonale romstasjonen (ISS) laurdag.

Dette blei avlyst som følgje av dårleg vêr utanfor kysten av Florida.

– Ekstra tid i bane betyr bonusforsking, skreiv Wandt på instagramprofilen sin laurdag.

• NRK snakka med Wandt om hans forhold til Noreg. Her kan du lese kva han sa.

80 timar med forsking

Laurdag 20. januar kom laget hans fram til den internasjonale romstasjonen.

Då hadde dei vore på reise i rommet i nær 37 timar.

Ved ISS skulle dei vere i to veker for å utføre ulike eksperiment og forsking på oppdrag frå firmaet Axiom Space.

Dei skulle mellom anna forske på såkalla romsjuke, stamceller og kunstig intelligens.

– Dei siste to vekene har eg jobba med nesten 20 eksperiment i over 80 timar for å løfte europeisk forsking og ny teknologi, skriv Wandt på Instagram.

Han trekk fram celleforandringar, stressnivå, søvn og yting som eksempel på kva han har jobba med i verdsrommet.

Uvisst når dei returnerer

Laurdag hadde astronautane ein fridag i rommet, men søndag var dei i gang med forskinga igjen.

Den svensken Rymdstyrelsen håpa på retur for den svensknorske astronauten måndag.

No henger også dette i ein tynn tråd.

– Eg veit at det rundt klokka 15 måndag svensk tid vil bli tatt ei avgjerd på om det går an å sende han heim, eller om ein må vente ytterlegare, seier Johan Marcopoulos, kommunikasjonsansvarleg i Rymdstyrelsens til NTB.

Noregs første astronaut i rommet

43 år gamle Wandt vaks opp utanfor Karlstad i Sverige, men mora bur på Gjøvik.

– Spør du ho, så er eg ganske mykje norsk, men også om du spør meg, fortalde han til NRK før han reiste opp i rommet.

Han er den første med norsk statsborgarskap i verdsrommet.

To svenske astronautar har vore i verdsrommet før han.

Han er stolt av å representere både Sverige og Noreg.

• Etter 37 timar var laget endeleg på plass ved den internasjonale romstasjonen. Her kan du lese kva svensknorske Wandt sa frå verdsrommet.