Aurora Helmine Hagen sit bak ei halvferdig kjole, ho jobbar med detaljane på ein lyserosa kjole.
– Eg tilpassar den litt meir til ball ved å sy på eit band rundt midja. I ein farge som matchar kjolen, seier Aurora.
Ho meiner ein kan spare pengar ved å satse meir på redesign og gjenbruk.
– Nordmenn brukar for mykje pengar på kjolar som ein bruker berre ein gong, og det gjeld klede generelt òg.
Gjenbruk til fest
Elevar frå Lillehammer vidaregåande skule har i samarbeid med Fretex sydd om kjolar, som ungdomsskuleelevar kan bruke til årets skuleball. I kveld får dei moglegheit til å kjøpe og sjå på redesigna festkleda – før alle andre.
– Bakgrunnen er å få dei unge til å forstå at dei kan kjøpe gjenbruk når dei skal på ball og pynte seg, seier butikksjef ved Fretex Lillehammer Hege Riise til NRK.
Dei har både moderne og meir retrokjolar i butikken.
– Eg har nok litt meir sansen for retrokjolane, som kanskje ikkje vil falle i like stor smak hos ungjentene.
Kjøpte kjole til 4000
Marie Lukas er ei av dei som er med på å redesigne kjolar, ho kjøpte sjølv ein ballkjole til 4000 i si tid.
– Det er veldig dyrt. Det er mykje betre å kjøpe noko billig, som er like fint.
Fretex på Lillehammer har hatt suksess med opplegget tidlegare, og Riise seier det er gode grunner til velje gjenbruk framfor å kjøpe nytt.
– Det er miljøvennleg, og du kjøper eit plagg som har ei historie frå før, det er spennande å tenke på, seier Riise.