Uroa for rekrutteringa: – Det blir jokeren

Mjøssjukehuset blir det tredje store sjukehuset i Noreg som blir plassert utanfor dei største byane i eige fylke.

Måndag vart det klart at det er her, i Moelv, byen midt mellom Hamar, Gjøvik og Lillehammer, det nye storsjukehuset i fylket skal liggje.

Sjukehuset blir arbeidsplassen til rundt 4000 personar. I tillegg skal det vere 600 sengeplassar på huset.

No fryktar fleire for rekrutteringa til storsjukehuset, som skal liggje i Innlandets femte minste by med knapt 4460 innbyggjarar.

Slit allereie

For å kunne fylle sjukehuset med folk med rett fagkompetanse og fagmiljø, krev no Sjukepleiarforbundet i Innlandet at rekrutteringsproblema blir teke på alvor.

– Det blir jokeren, den største utfordringa, meiner Ida Høiby, fylkesleiar for Norsk Sykepleierforbund Innlandet.

– Vi veit at vi går inn i ei tid der vi får færre sjukepleiarar, og det er dessverre slik at dei ikkje blir i yrket, seier ho.

Noreg manglar 4650 sjukepleiarar og 700 spesialsjukepleiarar, ifølgje Navs Bedriftsundersøking.

Berre i Innlandet manglar ein no 355 sjukepleiarar og jordmødrer.

Ifølgje SSB vil mangelen på sjukepleiarar auke i åra framover.

Høiby trur utfordringa med rekruttering gjeld uavhengig av kor sjukehuset ligg.

– Vi blir så mykje færre sjukepleiarar i framtida, så uansett kva alternativ ein har, så vil rekrutteringa vere utfordrande, seier ho.

Mista over 20 prosent av dei tilsette

På Kalnes utanfor Sarpsborg stod det nye storsjukehuset klart i 2015.

Øyvind Moksness, føretakstillitsvald ved Sjukehuset Østfold, fortel at dei mista ein femtedel av dei tilsette då dei flytta inn i det nye sjukehuset for åtte år sidan.

– Hovudsakleg gjekk dei til kommunen, nokon valde å pensjonere seg tidleg, medan andre bytta yrke, seier Moksness.

I dag slit også dei med rekrutteringsutfordringar, men han trur ikkje det er på grunn av at sjukehuset ikkje ligg i byen.

– No er det andre ting som slår inn, slik som til dømes arbeidsforhold, ikkje nødvendigvis plasseringa, seier Moksness.

Når det nye storsjukehuset i Innlandet skal byggjast, meiner han det er viktig at staden blir så attraktiv som mogleg for dei tilsette.

– Det må vere gode arbeidsforhold og dei må ha høve til å komme seg til og frå jobb på ein grei måte.

– Så må arbeidsgivar og kommunen eller byen vere med på å gjere staden attraktivt og tiltrekkje seg folk. Det må vere eit felles løft, seier Moksness.

Arbeidsplassar der folk bur

Ordførar på Hamar, Einar Busterud (BBL), meiner det er fleire ulemper ved å plassere eit nytt, stort Mjøssjukehus i Moelv.

Han peikar spesielt på rekrutteringsutfordringar.

– Eit sjukehus utan tilsette gir som regel dårleg behandling, seier Busterud.

Fylkesleiar Høiby ønskjer at Sykehuset Innlandet skal vere ein robust og god arbeidsgivar no og i framtida.

– Då er det jo viktig at det er arbeidsplassar der sjukepleiarane bur.

– Bur dei i Moelv?

– Nokon bur i Moelv, men vi bur ganske spreidd. Vi bur i byar og på dei små tettstadene rundt byane, seier fylkesleiaren.

Ulla Higdem, professor i samfunnsplanlegging, trur det kan endre seg.

Professoren meiner at avgjerda om at sjukehuset skal liggje mellom dei tre mjøsbyane vil ha mykje å seie for kvar folk vel å busetje seg dei neste åra.

– Eg vil tippe at Moelv blir ein relativt mykje større by framover, seier ho.