Brannen er skjedd i løpet av natta i Tangen Dyrepark, litt utanfor Hamar.
Dyreparken er no vinterstengt og opnar ikkje før i mai.
– Det vart oppdaga av ein dyrepassar i dag tidleg då han skulle køyre morgonrunde for å mate dyr, seier Erik Nielsen som er eigar av dyreparken.
I bygget som brann ned var sju Wallaby-kenguruar.
– Dei er både ute og inne. Men på kvelden er dei inne og søv inne. Det har vore ekstremt kaldt no då, seier Nielsen.
Pregar dei tilsette
Han fortel at bygget var heilt nedbrent og det var berre restar av bygget og røyk som kom frå branntomta då dyrepassaren kom.
– Det er dyr som du jobbar til dagleg med. Det blir som å miste eit kjeledyr for dei som jobbar her, seier eigaren av dyreparken.
Dyreparken er på eit område på rundt 200 mål. Bygget til kenguruane var eit lite hus på 45 kvadratmeter som stod i tilknyting til der kenguruane er ute om sommaren.
Bygget var frittståande og det var ikkje fare for at det kunne spreie seg til andre bygg og skade andre dyr.
– Det er trist og det pregar dei som jobbar her sjølvsagt. Det er ein trist sak. Verkeleg, seier Nielsen.
Truleg elektrisk
Politiet veit ikkje enno kva som er skjedd her.
– Det vi veit er at det har vore kaldt og det var elektrisk varmeomn inne i bygget. Det kan ha ein samanheng utan at vi kan konkludere med det no, seier Per Solberg i politiet.
Politiet har teke bilete, avhøyr og undersøker brannstaden.
– Vi skal finne årsaka sjølv om vi mistenker at det har med elektrisitet å gjere, seier Solberg.
Erik Nielsen seier dei har brannvarslingsanlegg i dyreparken. Men dei hadde ikkje det i bygget der kenguruane var.
– Vi må berre vente og sjå kva politiet finn ut av. Det verste er at vi har mista dyra som vi var veldig glad i alle saman, seier Erik Nielsen i dyreparken.
- Les også: