Vegen er no opna igjen etter å ha vore stengd sidan snøskredet gjekk i dag tidleg.
Politiet fekk melding om skredet like etter klokka sju på morgonen. Det gjekk ved Knutstugu i Vikedalane, to-tre kilometer vest for Lom.
Skredet breidde seg over vegen, og var ifølge politiet mellom 80 og 100 meter breitt, og 1,5 meter høgt.
Tor Trønnes som var innsatsleiar, seier at autovernet vart pløgd ned og at det vart store skader i området.
Radar kan ha redda liv
Strekninga der skredet gjekk var utstyrt med radarvarsling. Det vil seie at trafikklys nede ved vegen lyser raudt når det blir registrert ristingar oppe i fjellveggen.
Det kan ha redda liv, seier innsatsleiar Tor Trønnes. Det vart ikkje funne bilar eller menneske i snømassane.
– Dei bilane som stod på kvar side av skredet stoppa truleg på grunn av det raude lyset, utan at vi har det hundre prosent bekrefta. Hadde dei halde fram kunne dei ha blitt tekne av skredet. Det er det ikkje tvil om, seier han.
Radaren er sett opp av bedrifta Cautus Geo AS, og dei skriv i ei pressemelding at radaren i Lom rakk å melde frå før også den vart teke av skredet.
– Ser dramatisk ut
Vegen er einaste utfartsveg sørover for dei som bur i Skjåk, og ifølge tips frå folk som bur i området mista dei også straumen.
– Eg vart ringt av venner og kjente som lurte på om det gjekk bra med oss, seier Øystein Garmo.
Han bur rett i området der skredet gjekk og kom seg raskt ut for å observere det som skjedde der. Han trur høgspentlina er nede.
– Tre ligg spreidd langt utover isen her. Det ser eigentleg ganske dramatisk ut, sa Garmo.