Både politiet og 110-sentralen i Hordaland melde om ulukka klokka 19.12 søndag kveld.
Dei rykte ut til Manger i Radøy kommune i Hordaland.
– Det var to personar involvert i ulukka. Dei skal ha treft ein stein og deretter køyrd inn i ein betongvegg, fortel operasjonsleiar Terje Magnussen i Vest politidistrikt.
Dei to involverte er ein mann i 60-åra og ei kvinne i 20-åra. Det var AMK som først fekk melding om ulukka klokka 19.05. Dei sende deretter ut trippelvarsling.
Til sjukehus med luftambulanse
Ulukka skal ha skjedd nordvest for Manger sentrum, i Grindheimsvegen.
Det var folk i nærleiken, men det var ingen vitne til sjølve ulukka.
Like før klokka 20.00 tok luftambulansen med seg ein av personane til Haukeland universitetssjukehus i Bergen.
Litt seinare vart den andre personen tatt med til same sjukehus i vanleg ambulanse. Skadeomfanget er ikkje kjent.
– Begge var vakne og har ikkje vore medvitslause. Ein av dei hadde smerter i ryggen, fortel Magnussen i politiet.
Det er ikkje mistanke om promillekøyring.
