På torsdag fortalde NRK om Torkjell Kjosås, som hadde oppdaga ein skadd hannørn frå stovevindauget sitt. Ørnen sat på eit skjær 500 meter ute i fjorden ved Norheimsund.
Rundt ørnen trippa ein stor flokk kråker, medan ørnemaken haldt seg i nærleiken.
Fredag ettermiddag gjorde Kjosås seg klar til å dra ut saman med ein tidlegare viltoppsynsmann for å fange hannørnen og levere den til veterinæren. Men på grunn av ei misforståing, vart redningsaksjonen utsett.
- LES OGSÅ:
Saka i eigne hender
Kjosås, og kameraten Arvid Holt, tok då saka i eigne hender, og byrja på redningsaksjonen sjølv på laurdag.
– Vi redda ho i dag og det gjekk veldig fint, seier Kjosås på telefon laurdag ettermiddag.
Havørnen er tatt med til land og førebels plassert i eit stort laksebur.
– Då vi reiste ut til den, byrja den å springe ut på sjøen. Vi rodde i båt roleg etter ho, og så til slutt klarte vi å fange ho, forklarar Kjosås.
Skadd vengje
Klørne til havørnen er veldig farlege, men Kjosås klarte å ta ho i vengene og fekk eit snøre rundt beina og klørne.
– Dei klørne er nesten like svære som hendene mine, så det gjeld å vere forsiktig. Heldigvis gjekk det fint, og ho var veldig roleg etterpå, forklarar Kjosås.
Han fortel vidare at ørnen er skadd yttarst på venstre vengje.
– Det ser ut som at ho har vore i ein kamp, men skaden kan nok fiksast. Det er eg rimeleg trygg på, forklarar Kjosås.
– Vi får håpe det er andre ting
Viltkontakten i fylket har ansvaret for å overta skadd vilt. Dei skal i dag, måndag, ta den vidare til ein veterinær som skal få undersøkt kor skadd ørnen er.
– Dei skal då sjå om det er noko dei kan behandla. Om den har brekt vengja, er det lite å gjere for den. Vi får håpe det er andre ting, seier Kjosås.
Saknar maken
Måndag fortel Kjosås at det er tydleg at Ørnhild saknar maken sin Ørnulf.
– Ørnhild set no i lange periodar på skjæret og speidar etter Ørnulf, seier Kjosås.